Sassuma arnaa uleerneqarpoq
Sassumap arnaa kusanarluinnarpoq, arnarpalulluinnarluni, nujarsui takisuujupput taakkununngalu imaani nunamilu uumasut atapput, angakkumik ataqqinartumit nujai ilaajarneqarput.
Eqqumiitsuliortoq Christian Rosing sassuma arnaanik qiperuisuuvoq, qiperugarlu uumassuseqartutullusooq isikkoqarpoq, soorlumi tassa angakkup sassumap arnaata nujarsuinik ilaajaanerani uumasut iperarneqassasut.
Nuup kommuneata Meeqqanut Kulturimullu ataatsimiititaliaata siulittaasua Maliinannguaq Marcussen-Mølgaard uleersinermi ilaatigut oqarpoq, sassumap arnaata oqariartuutigisartai, avatagiisinik uumassusilinnillu ataqqinnilluta inuunissarput pingaaruteqartoq, taamaanngippat sassumap arnaa kamalluni piniagassat inuunitsinni pingaaruteqartut tunniukkunnaasallugit, iluamik inuulinngikkutta.Taamannallu oqariartorneq ullutsinnut aamma tulluulluinnartoq, tassa nunarsuarmi silamik avatagiisinillu migutsitinerujussuaq eqqumaffiginerusariaqaratsigut.
Uleersinermi najuuttorpassuit umiarsualivitoqqap sissaa sinerlugu sanileriaallutik nikorfapput, sassumap arnaatalu uleerneqarnerani ersaattaallutik. Uleersinermi aamma erinarsoqatigiit NIPI erinarsorput, tivasartorlu Egon Sikivat alutorineqaqaluni illartitsisarlunilu takutitsilluarpoq.
Maannalu sila nillersukasiummat, immikkut ittumik qaaqqusat Hans Egedep illuani ilasseqatigiipput, ilaatigut kalaaliminernik tamulugassaqassallutik.
Uleersinermi sassumap arnaa sissami tininngasumi ersiinnarpoq, ulippallu morsukkumaarluni.