Sassarumanngitsut

septembarip 25-at 2005 18:19

Pingasunut radioaviisitsinni oqaatigaarput Kalaallit Nunaanni angajoqqaat atuartuutillit meeqqamik atuarfiinik aqutseqataanissamut soqutigisaarussimasutut oqaatigisassanngorsimagunartut Nuuk uuttuutaappat tassani atuarfiit siulersuisussaannut qinigassangortitsiniarneq ajornakusoorluinnartutut A/G-mit isumaqarfigineqarmat.

Namminersornerullutik Oqartussat nalunaarutaat malillugu novemberip aallaaqqaataa tikitsinnagu atuarfiit siulersuisuinut angajoqqaaneersunik qinigassanngortitsineqartussaavoq, atuarfik angilluaraangat angajoqqaanit tallimat sinniisissaallu qinerneqartussaallutik.

Nuummi ataatsimiititsinerni siullerni angajoqqaat najuuttut ima ikitsigisimapput qinigassanngortitsiniarluni ataatsimiititseqqittariaqarluni. Ataatsimiititsinerit tulliit pissapput oktobarip ulluisa aqqarnanni, siulersuisunulli qinersineq aatsaat pissalluni oktobarip ulluisa 26-anni.

A/G-mi aallaaserisami atuarneqarsinnaavoq atuarfinnut siulersuisussarsiorneq Kalaallit Nunaanni assut ilungersunartuusoq angajoqqaanit qinersiartortartut ikittuinnaammata, atuarfinnik nakkutiginnittut skolenævnit siulersuisunik taarserneqarnialermata soqutiginninneq malunnarseriarluni maanna annikilliallarujussuarsimalluni, kisianni Sisimiuni Nalunnguarfiup Atuarfiani angajoqqaanik ataatsimiititseqqaarnermi angajoqqaat arfineq-marluk qinigassanngortikkumallutik nalunaarsimapput qinigassanngortissinnaanerminnillu ilimasaarisut arlaliullutik, Nalunnguarfiup Atuarfiani pisortap tullia, Emil Larsen oqarpoq.

Sisimiuni Nalunnguarfiup atuarfia 600-t missaanni atuartoqarpoq..