Nunatsinni biskoppissamik qinersineq septembarip ulluisa aappaanni pissaaq. Toqqorsivimmit assi.Assi: Connie Fontain / KNR

Sassartut sisamaasut: Biskoppissamik qinersineq aallartittoq

Qaqortumeersoq, Nuummeersoq, Upernavimmeersoq Qasigiannguaneersorlu nunattta nutaamik biskoppitaarnissaanut qinersinissamut sassarput.

Nunatsinni biskoppi ukiuni 25-ni biskoppioreersorlu biskoppimik nutaamik qinersisoqartussanngorpoq. Sassarnissamut piffissaliussaq qaangiuteqqammerpoq, sassartullu sisamaapput.

Sassartulli qinersinermut ataatsimiititaliamit inaarutaasumik akuerineqarnissaat amigaataaginnalertoq, Biskoppeqarfik KNR-imut ilisimatitsivoq.

Sassartut ukuupput:

  • Paneeraq Siegstad Munk - Kujataani provsti. Qaqortumi najugalik
  • John Johansen - Domprovsti. Nuummi najugalik
  • Hans Jørgen Dinesen - Palasi. Upernavimmi najugalil
  • Henriette Have - Palasi. Qasigiannguani najugalik

Nunatta biskoppia, Sofie Petersen, soraarninngorniarluni nalunaarnikuummat, biskoppissamik qinersineq aallartippoq. Sofie Petersen nunatsinni 1995-imi maajip ulluisa 28-anni biskoppinngorpoq.

Novembarimi nutaamik biskoppinngortitsisoqassasoq

Biskoppinngortussamik qinersineq 2020-mi septembarip ulluisa aappaanni pissaaq. Nunatsinni palaseqarfinni sulisut, soorlu palasit, biskoppimik nutaamik qinersisinnaatitaapput.

Nunarput novembarip ulluisa 22-anni nutaamik biskoppitaassaaq, tamannalu Nuummi Hans Egedep Oqaluffiani pissaaq. Danmarkimi biskoppit qulit najuutissapput, Dronning Margrethelu najuunnissaminut aamma qaaqqusaalluni.

AAMMA ATUARUK Efter 25 år: Hvem skal være ny biskop?

Ilinniartitaanermut, Kultureqarnermut Ilageeqarnermullu Naalakkersuisoq, Ane Lone Bagger (S), biskoppimik nutaamik qinersinissamut aamma qilanaarpoq:

- Nutaamik biskoppinngortitsineq annertoorujussuuvoq, ilaatigut tamatuma pisarnera akuttummat, biskoppili Kalaallit Nunaanni Ilagiit aamma qullersarimmassuk. Taamaattumilk Oqaluffitsinni ineriartortitsinermi annertuumik inissisimalluni, taanna tusagassiorfinnut nalunaarummi oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat