Sascha Blidorf ataatsimeersuartunut: Kalaallit Nunaanni inuuniniarnikkut allannguutit oqaluttuariartussavakka
Silap pissusaa pillugu ilungersuuteqartut nunarsuarmi tamanit pisut peqatigalugit, ulluni sisamani tupermi unnuissapput, nunarsuarmi nunat pisuunerit ataatsimeersuarfigisaata silataani .
Nunarsuarmi nunat pisuunerit siuttuisa 50-it missaanniittut ataatsimeersuarnerat World Econoic Forum Schweizimi illoqarfimmi Davosimi jannuarip ulluisa 21-nit 24-ata tungaanut pissaaq, tassani ilaatigut USA-mi præsidenti Trump peqataassaaq.
- Nunarsuarmi nunat pisuunerit siuttuisa ataatsimeersuarneranni oqaluttuariniarparput takutinniarlugulu nunarsuup kiatsikkiartornerani qanoq iliuuseqartariaqartut allannguisariaqartullu, Sascha Blidorp taama oqarpoq.
Ilisimatuut silallu pissusaa pillugu ilungersuuteqartut
Illoqarfik Davos qaqqat Alpit akornanniippoq aqqaneq marlullu tikillugit ississinnaalluni. Silap pissusaata allangoriartorneranut ilungersuuteqartut tupermi unnuisassapput tupeqarfissallu taaguuteqarpoq Arctic Camp.
Tassaniinnerminni nunarsuarmi nunap pisuunerit siuttuinut oqariartuutigineqarpaat, silap pissussaata allanngoriartornera qanoq iliuuseqarfigisariaqaraa ingammik issittumi.
AAMMA ATUARUK Folketingimut qineqqusaartup silap pissusiata allanngoriartornerata akiornissaa pingaarnerutikkusukkaa
- Ulluinnarni takusartakkagut oqaluttuariniarpakka soorlu sermersuup aakkiartornera, tamassumalu kingunerisaanik aalisartunut piniartunullu sunniutai, aamma nunatta avannaani qimussertartut qimussitik atorpiarsinnaajunnaarpaat sikuerukkiartormat, tamakkuupput oqaluttuarisassagut, Sascha Blidorp oqarpoq.
Silap pissusaata allanngoriartorneranut ilungersuuteqartut nunarsuarmi siuttut iliuuseqarnissaannik oqariartuutaat nittartakkami Arctic Basecampimi atuarneqarsinnaasut.
Blidorf: Kikkut tamarmik iliuuseqarsinnaaput
- Siullermik tamatta, inuiaqatigiit tamatta iliuuseqarsinnaavugut, soorlu mikisunnguaniit aallartissinnaavugut puussiat plastiskit atorunnaarlugit, tamakkua aamma iluaqutaasinnaapput, Sascha Blidorf oqarpoq.
Sascha Blidorfillu erseqqissaatigaa, silap pissussaata allanngoriartornerata unitsinneqarnissaanut politikerit kisimik iliuuseqarsinnaanngimmata:
Sascha oqaluttuarpoq silap pissussaata allanngoriartornerata iliuuseqarfigineqarnissaanik nammineq ulluinnarni iliuuseqartarluni, - puussiat plastikkit atorneq ajorpakka aamma ajassaatit saviillu ataasiaannartakkat atorunaarnikuuakka, tamakkuaqqat unitsinnikuuakka nunarsuarmut iluaqutaanngimmata, Sascha Blidorf oqarpoq.