SAS Lufthansamit pisiarineqassagunarpoq

-Isumaqatigiinniartoqarpoq, tusarfiit ilaat Reutersimut oqarpoq.

Timmisartuutileqatigiiffiup tuniniarneqalerneranik oqalunneq SAS-ip miserratiginngilaa, tusagassiuutinulli naatsukullammik allakkaminni ilisimatitsipput timmisartoqarfiup iluani allanngortiterinissartik eqqarsaatersuutigigitsik.

SAS aningaasatigut ilungersunartorsioqisoq Lufthansamut maajimili saaffiginnissimavoq tusarniarlugu timmisartuutileqatigiiffimmik pisinissaminut soqutiginninnersoq.

Lufthansap skandinaviamiut timmisartuutileqatigiiffiat pisiarissagaluarpagu, angallanneq eqqarsaatigalugu, tassaalissagaluarpoq Europami timmisartuutileqatigiiffiit annersaasa tulliat. Lufthansa-SAS Air France KLM-imit minnerulaaginnassagaluarpoq.

Timmisartuutileqatigiiffiup tuniniarneqartussanngorunarnera tutsiunniariarmat SAS-ip aktiaatai akitsorujussuarput.