SAS-ip timmisartuussinissaralui hunnorujulikkaat taamaasillutik maanna taamaatiinnarneqartariaqassapput.Assi: Nils Meilvang/Ritzau Scanpix

SAS-ip pisortaanera: Timmisartortartullu isumaqatigiinniarnivut ajalusoormata suliumajunnaarput

Timmisartortartut suliumajunnaarnerat marloriarluni kinguartinneqaraluartoq SAS-ip timmisartortartullu akornanni isumaqatigiinniarnerit iluatsinngitsoormata timmisartortartut suliumajunnaartut, SAS ilisimatitsivoq.

Timmisartuutileqatigiiffiup SAS-ip timmisartortartullu akornanni isumaqatigiinniarnerat ajalusoorput, timmisartortartullu tamanna pillugu suliumajunnaalerlutik. SAS-ip tamanna uppernarsarpaa.

SAS-imi timmisartortartut 1000-t missaat Danmarkimeersut, Norgemeersut Sverigeminngaanneersullu SAS Pilot Groupimeersut suliumajunnaarniarnertik siullermik juunip ulluisa 29-anni aarlerisaarutigaat.

Norgemi, Sverigemi Danmarkimilu isumaqatigiissitsiniartartut isumaqatigiinniartuupput, suliumajunnaarniarnerilli marloriarlutik kinguartinneqarlutik. Isumaqatigiinniarnerit Danmarkimi ullumikkut nalunaaqutaq ulloqeqqanut killilerneqarput, illuatungeriilli tassani isumaqatigiissusiorsimanngillat taamalu suliumajunnaartoqalerluni.

TV 2-p oqarnera naapertorlugu SAS-ip pisortaanerata Anko van der Werffip isumaqatigiinniarnerit ajalusoornerat tusagassiortunut nalunaarutigaa.

SAS-ip timmisartuussinissaralui hunnorujulikkaat taamaasillutik maanna taamaatiinnarneqartariaqassapput.

"Allatut iliorsinnaajunnaaratta suliumajunnaarpugut"

SAS-ip piumasaqaataanik naaperiaasimagaluarlutik, timmisartortartut isumaqarput. SAS-ili piumasaqaateqarneruleriaannarsimasoq timmisartortartut misigisut, danskit timmisartortartuisa peqatigiiffianni Dansk Pilotforeningimi siulittaasoq Henrik Thyregod TV 2-mut oqarpoq.

- Piumasaqaataanut naapertuuttunik ulloqeqqanut neqerooruteqarnitsinni piumasaqaqqeriaannarpoq, taanna TV 2-mut oqarpoq.

- SAS-ip piumasaqaataanik naapitseriaaraluarnitsinni SAS allanik piumasaqaqqimmat allatut iliorsinnaajunnaaratta suliumajunnaarpugut.

Dansk Pilotforening SAS-ip Pilot Groupianut ilaavoq, taannalu timmisartortartunik Sverigemeersunik Norgemeersunillu aamma ilaasortaqarpoq.

SAS timmisartortartullu SAS Pilot Groupimeersut maannamut isumaqatigiissut apriilip aallaqqaataani atorunnaareersorlu nutaamik isumaqatigiissusiorsinnaasimanngillat.

Timmisartuussinissaraluit ilarpassui taamaatiinnarneqartut

SAS Pilot Group timmisartuutileqatigiiffiup qitiusumik suliffeqarfiutaata SAS Scandinavianip timmisartortartuinut sinniisuuvoq. Suliffeqarfiilli minnerit allat marluk, tassa SAS Connect aamma SAS Link taassuma ataani aamma inissisimapput. Suliffeqarfinnilu marlunni taakkunani timmisartortartut timmisartuutileqatigiiffimmi sulisut kattuffissuat Flyvebranchens Personale Union sinniisoraat.

Tassani ilaasortat suliumajunnaarnermit sunnerneqaratillu suliinnassapput. Timmisartortartulli taakku ikinnerumaarput.

Taamaammat aaqqiissuteqartoqarnissaata tungaanut SAS-ip timmisartuussinissaralui suliumajunnaartoqarnerata kingunerisaanik taamaatiinnarneqartariaqassapput. Timmisartut sorlerpiaat qassillu timmisartuussiunnaartariaqarnersut suli ilisimaneqanngilaq, angalasussalli ullormut 30.000-t missaat suliumajunnaarnermit eqqorneqassasut, SAS ilimatitsivoq.

Kisianni SAS Link aamma SAS Connect aamma timmisartuussisartut allat timmisartuussiinnassapput.

SAS Linkip. SAS Connectip timmisartuussisartullu allat timmisartuussinissaat qaqugu pissanersut, SAS-ip nittartagaani takuneqarsinnaapput.

SAS suliumajunnaartoqarnerata saniatigut aningaasaliisussarsiortariaqassaaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl