SAS-ip Nunatsinnut timmisartuussisarnissaa nuannaarutigigaa
Angallannermut naalakkersuisup, Kim Kielsen-ip SAS-ip Kalaallit Nunatta Danmarkillu akornanni aappaagu timmisartortitsisarnissaa nuannaarutigalugu oqarpoq.
- Issittup Kalaallillu Nunaata ornigassatut ukiut kingulliit soqutigineqariartornera eqqarsaatigalugu, aqqutissat amerlineri nuannaarutigaakka, Kim Kielsen oqarpoq.
Naalakkersuisup ungasinngitsukkut Danmarkimiinnermini SAS-ip pisortaa, Susanne Larsen ataatsimeeqatigaa, tassanilu SAS-ip nunatsinnut angallassisarnerminni misilittagai, Nunatsinnullu angallassisarnerup pitsanngorsaavigineqarsinnaanera eqqartorneqarput.
- Neriuppunga SAS-ip Kalaallit Nunaata Danmarkillu akornanni angallassisalernera angallannikkut atassuteqaqatigiinnerup pitsanngorsaavigineqarnissaanut aallarniutaaginnartoq, Kim Kielsen oqarpoq.