SAS inunnik 700-nik soraarsitsisussanngorpoq
Aningaasat SAS-iminngaannit aniajuarnerat ullumi tusagassiortunik katersortitsinermi paasinarsivoq, anianerallu timmisartortitseqatigiiffiup ileqqaarutigisinnaasaannit sukkanerulluni. Timmisartortitseqatigiiffiup siorna periaaseq nutaaq, svenskit kr.-iinik 4 milliardinik naleqartoq saqqummiuppaa, erniinnarli paasinarsivoq aningaasat taakkua naammanngitsut. Ileqqaarniutit svenskit kr.-iinut 5,3 milliardinut amerlineqarput, aammali taakkua naammagatik, DR allaaserinnippoq.
SAS-immi pisortaata Mats Janssonip ullumi nalunaarutigaa suli 2 milliardit ileqqaarniutigineqassasut, tassalu svenskit kr.-ii 7,3 milliardit, tassungali killeqanngillat, tassami timmisartortartut saqisullu ippassaq unukkut SAS-imi qullersaasunut isumaqatigiissutigaat ileqqaarniutit suli allat nassaariniassallugit.
- Taamaattumik timmisartortartut saqisullu tamarmik piffissami sivikitsuarannguami svenskit kr.-iinik 500 millioninik nassaarniarnissaat akuersaarparput, isumaqatigiinniarnerillu aallarteriikkavut naammassissallugit taavalu saniatigut svenskit kr.-ii 500 millionit pitsanngorsaatissat pillugit erseqqissumik isumaqatigiissuteqassalluta, taama oqarpoq timmisartortartut siulittaasuat Mogens Højgaard.
Taamaalillutik ukiup ataatsip ingerlanerinnaani ileqqaarniutissani katillugit aningaasarparujussuit svenskit kr.-ii 7,8 milliardingajaat anguaat imaluunniit danskit kr.-inngorlugit 5,7 milliardit. Naallu timmisartortitseqatigiiffik nakkariaateqaraluartoq ikililerisoqaraluartorlu ukiup ataatsip ingerlanerani timmisartukkut angallaviit 45-nik ikilineqarlutik, timmisartullu 18-inik ikinneruleraluartut sulisullu 2.000-inik ikilineqaraluartut timmisartortartut siulittaasuat qullersaasunik suli tatiginnippoq.
- Qullersat qanoq iliorniarnerat takorusuppara, tassalu oqimaaqutaasunik tamanik piiaaniarmata.
