SAS annertuumik soraarsitsiortulersoq
Aningaasartuutit ikilisinniarneqarmata taamaaliortoqarpoq, timmisartortitseqatigiiffik taama nalunaaruteqarpoq. Soraarsitsineq SAS-ip sulliffeqarfiutaannut tamanut eqquissasoq, aviisimi Politikenimi allaaserineqarpoq, soraarsitaasut akornanni qallunaat 100-t soraarsitaassapput.
- Maannakkut inissisimaffitsinniiginnarnissarput pingaaruteqarmat, allaffeqarfimmi sulisut ikilisartariaqarsimavavut, SAS-imi pisortaaneq Rickard Gustafson oqarpoq.
Soraarsitsisoqarneratigut SAS-imi ukiormanna aningaasartuutini 1,7 milliardit koruuninik ileqqaartoqassaaq.
Nunarsuarmi tamani aningaasatigut ajornartorsiorneq aamma timmisartoritseqatigiiffinnit allanit unammillerneq annerulermat aamma ikummatissat akitsoriarujussuarnerat pissutaallutik SAS sulisuminik soraarsitsisariaqarsimavoq.