SAS Air Greenlandimut piginneqataajumajunnaarpoq

juunip 13-at 2007 10:07

SAS-p Air Greenlandimut piginneqatigiissutini tunissallugit, Sverigemi Stockholmimi ullumi ataatsimiinnermini aalajangerpoq.

SAS-ip Air Greenlandimik piginneqatigiissutini 37,5 procentiusut tuniniarlugit ullumi aalajangerpoq.

SAS-ip saniatigut Air Greenlandimik piginneqataasut marluk tassaapput Namminersornerullutik Oqartussat taakku piginneqataassutaat aamma 37,5 procentiupput, taavalu piginneqatigiissutit sinneri 25 procentit Naalagaaffimmit tigummineqarput.

SAS-ip piginneqataassutiminik tunisinialernera, SAS-imi siulersuisunit erseqqissumik tusarliunneqarsimatinnagu oqaaseqarfigisinnaanngikkini Air Greenlandimi pisortaaneq Michael Binzer oqarpoq.

SAS-ip piginneqataassutaanik kikkut pisiumasinnaanerat pillugu Michael Binzer oqarpoq soorunami eqqarsaatersortoqassasoq.

- Kisianni isumaqarpunga Namminersornerullutik Oqartussat piginneqataareersut pisisuussappata pissusissamisuussasoq, Michael Binzer oqarpoq.

SAS-p piginneqataasutaanik pisiumasoqassappat, piginneqataanermut isumaqatigiissut naapertorlugu neqeroortussat Namminersornerullutik Oqartussanit akuerineqaqqaartussaapput.

Air Greenlandip siulersuisuini siulittaasoq Julia Pars oqarpoq SAS-ip piginneqataajunnaarniarneranut tunngasumik massakkut oqaaseqarsinnaanani, Naalakkersuisunulli innersuussilluni. SAS-ip piginneqataajunnaarnissaa Air Greenlandimi siulersuisut uuma qaammatip naanerani ataatsimiilerpata oqaaluuserineqarumaartoq Julia Pars ilisimatitsivoq.