Sarpik Ittuk kingumut nunatsinnut
Arctic Umiaq Linep umiarsuaataa iluarsaanneqareersoq, Sarpik Ittuk, nunatta imartaani aasaru angalaqqilissaaq.
Umiarsuaq takornarnianik ilaasoqarluni Danmarkimiit juunip ulluisa qulinganni Qeqertarsuup Tunuanukassaaq.
Angalatitseqatigiiffiup Albatros Travelip Sarpik Ittuk attartorpaa. Albatros Travelip umiarsuaq aatsaat attartulinngilaa. Arctic Umiaq Line iluatsinngitsumik namminersortunngorsarneqarmat, angalatitseqatigiiffik piginnittunut ilaavoq.
Piginneqataasimaneq akisusimagaluaqisoq, Albatros Travelimi pisortaq, Søren Rasmussen, aarlerinngilaq.
- Sarpik Ittuk takornarnianik ukiuni arlalinni angallasissutiginiarlugu qulakkeerinnereerpugut, Søren Rasmussen oqarpoq.
Sarpik Ittuk amerikamiut suliffeqarfiutaata Quark Expeditionsip, maanna Sikuijuitsoq Kujallermut angalatitsisup, pisiaraa.
