Sarfaq Ittuup siunissaa aalajangiiffigineqassaaq
Angalanissamut ukioq mannamut pilersaarutit aggustip naanerani atorunnaarpata, sinersortaat Sarfaq Ittuk Kujataani Qaqortumiit Avannaani Ilulissat tungaannut angalaannassanersoq, suli qularnaarneqanngilaq.
Angallannermut ataatsimiititap upernaap ingerlanerani tamanna isummerfigisassaasa ilagaat. Ukiuni kingullerni pingasuni ilaasartut naammaginartumik amerliartorsimanngimmata, Arctic Umiaq Line aningaasatigut namminersorluni ingerlatsisinnaanngitsoq, Atuagagdliutini allaaserineqarpoq.
- Ilaasartut amerliartunnginnerannut nassuiaatigineqarpoq, Air Greenlandip aamma Arctic Umiaq Linep bilitsinut akigititaasa assigiinngissuteqarpallaannginnerat, taama nassuiaavoq umiarsuaatileqatigiiffiup pisortaa Jette Larsen, imalu nangilluni oqarpoq:
- 2009-mi sinersortaatitsinnut bilitsisisut ikileriarput. Ingammik takornariat ilaasartut ikileriarnerat malugilluarparput, taamaattumik ajornartorsiuterput marloqiusaavoq, Jette Larsen Atuagagdliutinut oqarpoq.
Umiarsuaatileqatigiiffiup Naalakkersuisut peqatigalugit ingerlanneqarsinnaanera oqaluuserisimagaat, Arctic Umiaq Linep siulersuisuini siulittaasup Flemming Knudsenip oqaatigaa.
Arctic Umiaq Line, ingerlallualeruttorfimmini ukiumut 60 miliuuninik pissarsiaqartarnermi saniatigut, pingasunik sinersortaatinik aamma sumiiffikkaartumik ilaasartatinik arlalinnik peqarpoq. Umiarsuaatileqatigiiffiup sinersortaat ataasiinnaq tassaasoq Sarfaq Ittuk ullumikkut pigaa, pisortaniillu tapiissuteqarfigineqarnani angallassisarluni.
