Sarfaq Ittuk tallimanngorpat angalaqqilissaaq
Arctic Umiaq Linep naatsorsuutigaa sinersortaat Sarfaq Ittuk, ataasinngormat ikkarlikkaluareermi kingorna, tallimanngorpamiit pilersaarutit malillugit angalaaqqilissasoq.
novembarip 24-at 2010 05:50
Sarfaq Ittuk Maniitsup kujataani ataasinngormat unnuakkut ikkarlippoq. Nalunaaquttalli akunneri pingasut qaangiummata ulimmat umiarsuaq nammineq kaanngarpoq, Nuummullu ulloqeqqata siorna nalunaaqutaq aqqanermut tikilluni.
Umiarsuaq tikimmalli aqqartartut teknikerillu misissulerpaat.
Ajoquserneri misissorneqareerpata iluarsaanneqassapput, Arctic Umiaq Linellu naatsorsuutigaa, sinersortaat tallimanngorpamiit angalaaqqilissasoq, pilersaarutillu malillugit sinersoqqilissalluni.
- Sarfaq Ittummut ilaasut apuffissaminnut Air Greenlandimit timmisartuunneqassapput. Ilaasut ajutoornermi quarsaarsimanerminnit eqqugaasimasut ikiortariaqartullu aamma attaveqarfigaavut, Arctic Umiaq Linemi pisortaq, Jette Larsen, oqarpoq.
