Sarfaq Ittuk sinersoqqilerpoq

Umiarsuup sinersornini aallarteqqissavaa marlunngorpat 19. marsimiit.

Umiarsuaq annertuumik iluarsarneqarpoq umiarsuup ukiup aallartinneraniilli Nuummi qaammatini marlunni uninnganerani, Arctic Umiaq Linemi pisortaq Jette Larsen oqarpoq.

Siunissaq eqqarsaatigalugu suliniutigut tamatumunnga ilaallutik sullissinermik pikkorissarnerit aamma umiarsuup iluarsaannera ilaasunik amerlanerusunik kinguneqartariaqarput tamatumalu inernerissavaa ingerlatseqatigiiffimmut aningaasatigut tapiissuteqartarnerit ikilinerat. Umiarsuup aserfallatsaaliineranut atatillugu suliassarpassuit inuttanit suliarineqarput. Tamatuma saniatigut inuttat pikkorissarnernut inatsisitigut piumasaqaataasunut aamma allanut sullittakkanut tunngasunut peqataapput, Jette Larsen oqarpoq. 

Sapaatit akunneranni matumani Arctic Umiaq Linep ilaaniarluni inniminniinermut atortoq nutaaq atulerpaa uani  www.aul.gl.

Arctic Umiaq Line Namminersorlutik Oqartussanut amigartooruteqannginnissamik qulakkiissummik 2016-ip naanerata tungaanut isumaqatigiissuteqarpoq. Isumaqatigiissut taanna isumaqatigiissutigineqarpoq umiarsuup sinersortaatip amigartooruteqanngitsumik ingerlanneqarsinnaanngimmat aamma politikikkut kissaatigineqarmat umiarsuup sinersortaatip atorneqaannarnissaa, umiarsuup illoqarfiit aqqanillit aamma nunaqarfiit marluk sapaatit akunneranut marloriarluni aqqusaartarpai.

Umiarsuarmik sinersortaammik ingerlatsinermi saniatigut Arctic Umiaq Line ingerlatsisunut namminersortunut sisamanut isumaqatigiissuteqarpoq Nunatta Qeqqani nunaqarfinnut arfineq pingasunut angallassisarnermut tunngasumik.