Sarfaq Ittuk sikorsuarnit mattussaasoq

Arctic Umiaq Linep umiarsuaa Sarfaq Ittuk, Torsukattammi siku anorilu pissutaallutik kinguaattooqqavoq, 37-nillu ilaasoqarluni maanna Arsuup kujataaniilluni.

Arctic Umiaq Line tusagassiuutinut nalunaarummi taama ilaatigut allaaserisaqarpoq.

Sarfaq Ittuup inissisimanera mobilikkut attaviit avataanniippoq, taamaattumillu ilaasut ilaquttaminnut attaveqarsinnaanngillat. Umiarsuup naalagaa nalunaarpoq ilaasut tamarmik ajunngitsut aammalu ernumanartoqanngitsoq.

Sarfaq Ittuk pingasunngormalli inissisimaffimminiilersoq, pisortap Aviâja Lyberth Lennert oqaatigaa.

- Anorip sammivia pissutaalluni siku sinerissamut qanittumiippoq, umiarsuarlu tamanna pissutigalugu avalassinnaanani. Anorip sammivia allanngungaarnavianngitsutut isikkoqarallarpoq, anorillu sammivia qitiullinnarpoq, pisortaq oqarpoq.

Ernumanartoqanngitsorli taassuma erseqqissaatigaa:

- Nerisassaqaqaaq, sulisullu ilaasut isumagilluarumaarpaat. Pisut malinnaavigilluarpavut, attaveqarfigisassavullu ataavartumik attaveqarfigaavut. Ernumanngilagut, ilaasulli apuuffissaminnut apuunneqarsinnaanissaat soorunami neriuutigaarput. Ilaasut umiarsuullu isumannannginnissaat pingaaruteqarpoq, Arctic Umiaq Linep pisortaa Aviâja Lyberth Lennert oqarpoq.

Ilaasussat billetsimik pisereersimasut kinguaattoornermillu eqqorneqartussat immikkut toqqaannaq attavigineqarumaarput.
Paasissutissat ingerlaavartut Arctic Umiaq Linep Facebookikkut quppernerani malinnaavigineqarsinnaapput.