Sarfaq Ittuk Qeqertarsuarmut ukiaanerani immikkut angallassiniartoq

Namminersorlutik Oqartussat sinersortaammik Sarfaq Ittummik ilaasunik angallassineq pillugu kiffartuunneqarnissamik Royal Arctic Line A/S isumaqatigiissuteqarfigaat. Isumaqatigiissut juunip 13-iani atsioqatigiissutigineqarpoq.
Allattoq Simon Uldum -
juunip 20-at 2017 06:54

Kiffartuussinissamik isumaqatigiissutip ataani, angalanissamut pilersaarutip ilisimaneqareersup saniatigut 2017-imi ukiaanerani angallavissami Sarfaq Ittummik Qeqertarsuarmut immikkut angallassinissamut aaqqiissutissaq nutaaq ilanngunneqarpoq.

- Royal Arctic Line aamma Arctic Umiaq Line suleqatigalugit, Sarfaq Ittuk-mik sinerissami ilaasunik angallassinerup ingerlateqqinnissaa iluatsimmat, nuannaarutigaara. Sarfaq Ittuk ukiorpassuarni imaatigut angalanermik nuannersumik misigisaqartitsisarluni aammalu inuiaqatigiinnut kalaallinut takornarianut tikeraartunullu nuannaarutaasumik iluaqutaasumillu sunniuteqarluartumik ilaasunik angallassisarnermigut ilisimaneqarluarpoq, naalakkersuisoq Erik Jensen taama allappoq.

Qeqertarsuaq angalanissamut pilersaarummut ilanngunneqartoq

- Tamatuma saniatigut 2017-imi ukiaaneraniit Qeqertarsuup angallavigineqarnissaa angalanissamut pilersaarummi ilanngunneqarmat naammagisimaartorujussuara. Taamaalilluni Qeqertarsuup angallavigineqarnissaa septembarip naaneraniit decembarip qiteqqunneranut Aasiaat aamma Ilulissat akornanni angalanissamut pilersaarummi ilaatinneqalerpoq, Erik Jensen taama allappoq.

Sarfaq Ittuk piffissami pineqartumi aqqaneq-marloriarluni nalinginnaasumik tikittassaaq aammalu juullimut atatillugu ukiortaareerpallu suli marloriarluni tikissasoq Namminersorlutik Oqartussat Arctic Umiaq Linellu naatsorsuutigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq