Sarfaq Ittuk Qaqortup saani ikkarlittoq

Sarfaq Ittuk nalunaaquttap 19.15 missarileraa tulakkiartortilluni Qaqortup saani ikkarlippoq. Qaqortumi maanna sakkortuumik anorlerpoq, umiarsuullu ikkarlinneranut anoraasuarfigitinneq peqqutaasoq, Royal Arctic Linemiit tusagassiutinut aatsaarluinnaq allapput.

- Umiarsuaq 86-inik ilaasoqarpoq. Kisianni ilaasut ulorianartorsiungillat, umiarsuaq navianartorsiunngilaq pissutsillu eqqissisimanarput, Umiarsuup naalagaa naapertorlugu ilaasut eqqissisimaqaat, Royal Arcitc Line-imiit allapput.

- Ilaasut tamarmik maanna nerisarfimmiipput, pisimasorlu pillugu umiarsuup naalagaanit ilisimatinneqarlutik, umiarsuaatileqatigiiffiup attaveqatigiinnermut pisortaa Jakob Strøm oqaluttuarpoq.

Kangilinnguani sakkutooqarfimmiit assigusumik oqaasissaqarput.

- Ilaasut 86-it inuttallu 21-it tamarmik ajunngillat. Alapernaarsuut Ejner Mikkelsen maanna Qaqortup eqqaaniippoq ikiuullunilu.

Umiarsuaq ajoqusersimanngilaq, immassimanngilaq uuliakooranilu, Kangilinnguani sakkutooqarfimi sillimasoq oqaluttuarpoq.

Jakob Strøm ilanngullugu ilisimatitsivoq, Qaqortumi imaq maanna tininnganerpaaffimminiittoq.

- Ulilluni immap qaffannera naammallualerpat umiarsuaq kaanngassaaq, ilaasullu niusinnaangussapput, Jakob Strøm oqarpoq.