Sarfaq Ittuk qaqippaat
Ullumi nalunaaqutaq marlut missaanni umiarsuup qaqinniarnera aallartippoq maannalu imaanut tunngajunnaarpoq, taamaattoq suliarineqarfissaminut suli apuutivinngilaq.
Arrikkaluamik isumannaatsumilli umiarsuaq piffissami kingullermi ajutuullattaasoq Nuummi Amutsivimmut ualeq manna qaqinneqarpoq.
Sarfaq Ittuk Qaqortumiit aallarniartilluni oktoberip qulingat ikkarlippoq aammalu ikkarlinnerup kingorna ajoqusersimanera misissorniarlugu Nuummi Amutsivimmut amuneqarnialerluni ikkarleqqilluni.
Umiarsuaq 2.118 tons-inik oqimaassusilik avammut sisooqqinnermini ikkarlippoq ajoquserlunilu. Ajoqusernera ima annertutigaaq umiarsuaq nammineq ingerlaqqissinnaajunnaarluni.
Arctic Umiaq Line-imit naatsorsuutigineqarpoq umiarsuaq ilaasuni novemberip 20-aniit angallasseqqissinnaalissasoq.