Sarfaq Ittuk Nuummut talissinnaanngilaq

Angallatit arlallit, soorlu Canadamiut aalisariutaat aamma Sarfaq Ittuk assersuinermit umiarsualivimmit anillatsaaliorneqarput.

Akerliussutsimik aamma takutitsisoqarpoq. Sissamiit Namminersorlutik Oqartussat allaffisuata tungaanut allagartarsualisarluni ingerlaartut malinnaaffigaavut.

- Iliuuseqarnissaq siunertaralugu aalisartut ullaaq oqaloqatiginiaraluarpavut, kisianni tigujumanngilaat. Isumaqarpunga paatsuungassutaat assigiinngitsut pillugit qanimut oqaloqatigiinnissaq pisariaqartorujussuusoq. Aggersaqqikkumaarpakka, oqaloqatigiinnerit aqqutigalugit aatsaat aaqqiisoqarsinnaammat, Aalisarnermut Piniarnermut Nunalerinermullu Naalakkersuisoq Ane Hansen oqarpoq.

Royal Greenlandimut aningaasaliissutit 500 millioni koruunit aalisartut oqalugiarnerminni uparuarpaat, oqarlutik nunani allani atugassatut aningaasaliinerummata nunaqavissut eqqarsaatigisariaqartut.

- Paatsuuineruvoq. Ullaaq ataatsimeeqatigigakkit nassuiaakkusussimagaluarpakka qanoq 500 millioni koruunit aamma aalisartunut qanoq isumaqarnersut, kisianni tusaajumanngillat, Ane Hansen oqarpoq.

Nammineq isumaqatigiinniarnerit tusagassiuutit atorlugit ingerlakkumanngilai.

- Ataqqeqatigiilluni oqaloqatigiinnerit aqqutaasaiaqarput. Imannak imminut qunusaarulluni angusassat annikittuararsuusarmata aamma oqaatigaara, nangippoq.

Kalaallit Nunaanni aalisarnertut piniartullu Kattuffiat akerliussutsimik takutitsinermut peqataanngilaq. Siulittaasorli Leif Fontaine najuuppoq:

- Kattuffimminngaanniit aalisarnermi atukkat pitsanngorsarneqarnissaat suliaraarput aamma uninnavianngilagut. Aalisarnerup imminut akilersinnaasunngortinnissaa anguniarlugu uagut politikkikkut sulissaagut, nassuiaavoq.

Aperaarput sooq kattuffik aalisartut sorsuuteqarnerannut tunuliaqutaannginnersoq.

- Soorunami kattuffik inatsisinik uniuisumik iliuuseqaqataasinnaanngilaq, pissutigalugu kattuffittut pisussaaffini inatsisit iluini inissisimatimmagu, Leif Fontaine oqarpoq.

Aamma pissutaanerarpai pisortanut isumaqatigiissutitik.

- Royal Greenlandimut tunngaviusumik isumaqatigiissuterput unioqqutinniannginnatsigu kattuffittut assersuinermi peqataanianngilagut, nangippoq.

KNAPK Royal Greenlandilu saarulliit akii pillugit juulip ulluisa 13-ianni isumaqatigiinniaqqissapput.

- 13. juli saarulliit akii pillugit isumaqatigiinniartussaavugut, imaassinnaalluarpoq tassani isumaqatigiissinnaanngivissugut. Taamaattumik neriuutigaarput Naalakkersuisut akunnermuliuttartumik taamanikkornissaanut pilersitsereersimassasut - isumaqatigiissinnaanngikkutta akunnermiliuttup aalisartut akinik pitsaanerusunik pissarsissussinnaassammagit, Leif Fontaine naggataagut oqarpoq.

Ane Hansen oqarpoq, aalisartut siunissaq pillugu oqaloqatiginissaat pingaartuusoq.

- Naatsorsuutigivara piffissami aggersumi ajornartorsiut anner takkukkumaartoq. Nunarsuarmi aningaasarsiornikkut ajornartorsiorneq nunatsinnut takkuttutut oqaatigineqarsinnaammat, sulilu pitsaap tungaanut ingerlannginnatta oqaloqatigiittariaqarpugut, Ane Hansen erseqqissaavoq.

Namminersorlutik Oqartussat silataanni amigaataavoq Demokraatit sinnerlugit Inatsisartuni aalisarnermut ataatsimiititaliami siulittaasunngortoq Andreas Uldum. Najuuttuuppat radioavisimut oqaaseqartikkusussimagaluarlugu iluatsinngilarput.