Sarfaq Ittuk novemberip naalernerani aatsaat piariissaaq
Sarfaq Ittuk Qaqortumiit sapaatip akunnera kingulleq avalanniartilluni talittarfiup paavatungaani ikkarlimmat, qanoq ajoqusersimatiginersoq misissorneqarniarlugu, Nuummi amutsivimmut qaqinniarneqartilluni sisusoorpoq, tassalu aappassaanik ikkarlilluni.
Umiarsuup aquuteqarfiata nalaa ima ajoqusersimatigaaq angallatigineqarsinnaajunnaarallarsimalluni.
Umiarsuaq Atlantiku ikaarlugu kalinneqassanersoq imaluunniit Nuummi amutsivimmut qaqeriarneqaqqissanersoq umiarsuaatileqatigiit maanna eqqarsaatigisariaqalersimavaat.
- Sapaatip akunnerani uani susoqarsimanersoq sukumiisumik misissuivigereerlugu, Nuummi amutsivimmut qaqeriarneqaqqinnissaa aalajangiupparput, qaqitsisarfimmimi suleriusissat pitsanngorsarneqareermata qaqitseriaqqinnissatsinnik misileeqqinnialerpugut, Arctic Umiaq Line-mi pisortaq, Jette Larsen Radioaviisimut taama oqaluttuarpoq.
Sarfaq Ittuup Nuummi amutsivimmut qaqeriaqqinneqarnissaa sapaatip akunnerata uuma naajartulernerani pissaaq.
Sarfaq Ittuup novembarip 20-iata tungaanut angallassiunnaavinnissaa avaqqunneqarsinnaanngilaq, ilaasartaammullu ilaasussaagaluartut tamatuminnga ilisimatinneqareerput, billitsisiaasalu akiisa utertinneqarnissaat neqeroorutigineqarluni.
Arctic Umiaq Line-p Air Greenland aamma Disko Line attaveqarfigereerpai, taakkulu ilaasussanik naliginnarmit amerlanerumaanik, sapaatit akunnerni tullinnguuttuni isumaginninnissaat isumaqatigiissuteqarfigereerlugit.
Aamma nunaqarfiit Sarfaq Ittummik aqqusaarneqartartut allatigut periarfissaqartinneqalereersimasut AUL-imi pisortap, Jette Larsen-ip ullumi nalunaarutigaa.
