Sarfaq Ittuk kujataani silarlunnissaa pissutigalugu kujataanukassanngilaq
Kujataanimi sapaatip-akunnerata massuma ingerlanerani silarlunnissaa ilimasaarutigineqarpoq. Sarfaq Ittuk tamanna pillugu Nuummiit Qaqortumut sapaatip-akunnerata massuma ingerlanerani angalassanngilaq.
Allattoq Mads Lynge
novembarip 19-at 2018 17:24
Kujataanut angalanissaq, ilaasut ilorrisimaarnissaat eqqarsaatigalugu Arctic Umiaq Line aalajangerpoq kujataanut angalanissaq taamaatiinnarneqassasoq. Kinguaattoorujussuartoqarnissaanut ilimanaateqarnera pissutaalluni ilaasunut amerlasuunut sapaatip-akunneri arlerlugit sunniutilimmik eqquisinnaanera umiarsuaatileqatigiiffiup ernummatigaa, angalanissarlu taamaatiinnarneqarluni.
Sarfaq Ittuk Nuummut marlunngornermi ullaakkut tikissaaq, tallimanngornerullu unnukkuata tungaanut Nuummiiginnassalluni. Sarfaq pilersaarutit naapertorlugit taava avannamut tassani ingerlaalissaaq.
Ilaasut eqqugaasut toqqaannartumik attaveqarfigieqarumaartut nalunaarutigineqarpoq. Apeqqutissaqaraanni saaffiginniffissaq tassaavoq: info@aul.gl
