Sarfaq Ittuk kinguaattooqqavoq

Allattoq Mads Lynge
marsip 19-at 2007 05:55

Arctic Umiaq Line-p sinersortaataa Sarfaq Ittuk ajutooqqavoq ilaasussallu ikinnerpaamik 800-it missaanniittut eqqugaallutik. Timersortartut angalasussat eqqugaapput taamatullu poorskernerani sulinngiffeqarlutik angalasussat.

Sarfaq Ittuk Skagen-ip avataani ippassaq anorersuarsiortilluni aquttarfiani igalaavi pingasut aserorput, sumiissusersiutaalu atorsinnaajunnaarluni. Sarfaq Ittuk sinersorluni angalalersussaagaluarpoq marsip ulluisa 29-anniit – poorskernissaanut sapaatip akunnera sioqqullugu – sivikinnerpaamillu sapaatip akunneranik ataatsimik sivisutigisumik kinguaattoorpoq.

Sarfaq Ittummik ilaasussatut inniminneereersimasut akilereersimasullu Air Greenland-ip timmisartuinik ilaasariaqartussat, Air Greenland-ip akigitai malillugit akiliisariaqartussaasut Arctic Umiaq Line-p pisortaanerata Jette Larsen-ip erseqqissarpaa.

Arctic Umiaq Line Air Greenland-ilu ullumi ataatsimeeqatigiissapput, Sarfaq Ittuup ajutoornerata kingorna ilaasussaagaluit timmisartuunneqarnissaannik aaqqissutissamik nassaarniarlutik. Arctic Umiaq Line umiarsuarmik sinersortaammik ataasiinnaarmik peqarpoq, qaqugulu angalaqqilissanersoq nalunarallarluni.