Sarfaq Ittuk ilaasoqarluni ingerlaqqissinnaanngikkallarpoq

- Air Greenlandimut massakkut isumaqatigiissuteqarnerput naapertorlugu timmisartuussinerit marluk aqagu pissapput, Maniitsuminngaanniit ilai kujammut ingerlaaqqittussaagamik - Qaqortumut, Paamiunut Narsamullu, Jette Larsen nassuiaavoq.

Ilaasussat massakkut nalunaarfigiortorneqarput qanoq angalatinneqassanersut.

- Paamiormiut eqqaassanngikkaanni neriuppunga tamarmik aqagu ualikkut apissinneqarumaartut. AUL-ip pisortaa oqarpoq.

Sarfaq Ittuk qanormitaava pineqassava?

- Massakkut tassa suli misissorneqarpoq. Atortut elektronikkimut tunnganerusut qanoq ajoquserneqarsimanersut suli erseqqissumik paasinikuunngilagut. Suli misissuipput, ilimanarporlu sukumiinerusumik ulluni tulliulluni misissuisoqarallassasoq. Umiarsuup aamma ilaasoqartinnagu Nuummukaannissaa pilersaarutigineqarpoq, Jette Larsen oqarpoq.

Sarfaq Ittummut ilaallutik angalasussat aamma saaffigiortorneqartuassapput.

- Nutaanik pilersaaruteqalerutta ilaasussat soorunami saaffigiortoqqissavagut, ajoqusiineq qanoq annertutiginersoq paasigutsigu – aaqqissueqqinnissarlu qanoq sivisutigisumik piffissamik tigooraasariaqassanersoq.

Jette Larsen aamma oqarpoq, Sarfaq Ittuk ulluni tulliuttuni Nuummukartinneqassasoq, tassani suliarinera naammassineqassammat.