Sarfaq Ittuk ikkarleqqippoq
Ilimanarpoq qajannaaqqutit kikiassuait marluk artorsarpallaarnerisigut aanngarsimasut. Tamanna Sarfaq Ittup arriitsorsuarmik sliskikkut imaanut quaassimaneranik kinguneqarpoq, tassanilu ikkarleqqippoq.
Royal Arctic Line-meersup Jakob Strøm-ip oqaatigaa Sarfaq Ittuk putusimanngitsoq, taamaammallu imarmik isaasoqanngitsoq.
Massakkut naluneqarallarpoq qaqugu umiarsuarnut qaqitsisarfimmut qaqinniaqqinneqassanersoq, taamaattumik aamma nalunarallarpoq ilaasartaat qaqugu sineriatta imartaani angalaqqilissanersoq.
Sapaatip akunnerata kinguliani Sarfaq Ittup Qaqortumi ikkarlinnerata kingunerisaanik sapaatip akunnerani uani angalanissaagalua unitsiinnarneqarpoq, massakkutullu isikkoqartillugu ilimananngilaq tallimanngorpat Nuummiit pilersaarutaasoq malillugu aallarnissaa.
Sarfaq Ittuk pillugu paasissutissanik nutaanik takkuttoqariarpat paasissutisseeqqikkukaarpugut.
Sarfaq Ittuk, assiliisoq: © John David Eriksen