Sarfaq Ittuk attartorlugu ilinniartunik pissarsiorniartut
Aalborgimi Kalaallit Illuat suliniummik aallarniisuuvoq, Aalborgimilu Kalaallit Illuanni pisortaq Jan Thrysøe ima oqarpoq:
- Illoqarfinnut annernut allanut, soorlu Aarhusimut Københavnimullu naleqqiullugu, Kalaallit Nunaanneersunik ilinniartukinnerusugut, ukiup ataatsip matuma siornatigut paasivarput. Tamannalu uggoraarput. Kalaallimmi Nunaat Jyllandip avannarpasinnerusortaani pingaartinneqartorujussuuvoq, kalaallinillu ilinniartunik sullitaqarluartutut misigaluta, Jan Thrysøe oqarpoq, nangillunilu:
- Taamaammat iliuuseqarniarluta aalajangerpugut. Sinersortaat atorlugu Kalaallit Nunaanni illoqarfiit sapinngisamik amerlasuut tikinniarsarissavavut. Ilinniagaqarfiit Jyllandip avannaaniittut peqataanermikkut imminnut nittarsaassinnaanngussapput, Jyllandillu avannaata ilinniariarfissaqqissutut aamma nittarsaassinnaassallutigu, Jan Thrysøe oqarpoq.
Sarfaq Ittuk Ilulissaniit pilersaarutit malillugit septembarip ulluisa tallimaanni Aasiannukassaaq, kingornalu Sisimiunut, Maniitsumut Nuummullu angalaassalluni.
Sarfaq Ittuk illoqarfinnut ataasiakkaanut tikikkaangat kikkunnut tamanut ammasassaaq, Jyllandillu avannaani ilinniagaqarfinneersut naapinneqarsinnaassallutik.
Naak ilinniagaqarfiit ilaat peqataaniarlutik neriorsuuteqarsimanersut neriorsuuteqarsimannginnersulluunniit suli inissinngikkaluartoq, Kalaallit Illuata pisortaa Jan Thrysøe isumalluarpoq:
- Kalaallit inuusuttut Danmarkimi ilinniarusuttut pingaarnerutinniarpavut, qanigisaat ilaqutaallu aamma oqaloqatiginiarlutigit. Danmarkiliarlunimi ilinniarusunneq alloriarneruvoq imaannaanngitsoq, ilinniarusuttullu piareersarusuppavut, Jan Thrysøe oqarpoq.
Ilinniagaqarfiit 35-t 40-llu akornanni Sarfaq Ittumi naapinneqarsinnaanissaat, Jan Thrysøep ilimagaa. Suliniulli tamaanga killeqanngilaq. Jyllandimi suliffeqarfiit kulturikkullu suliniutilinnut aamma siaruaassimavoq:
- Ilinniagaqarfiit kisiisa matumani peqataatinneqarnissaat pilersaarutigigaluarparput, Jylllandilli avannaani allanik aamma periarfissaqarpoq. Suliffeqarfiit, Aalborg Kommune, soqutiginnittullu allat aamma peqataarusupput, Aalborgimi Kalaallit Illuanni pisortaq Jan Thrysøe oqarpoq.
