Sarfaq Ittuk angalaqqilissaaq, aamma Qeqertarsuatsiaanut

Sarfaq Ittuk aappaagu marsip ulluisa 29-anni angalaqqilissaaq.

Billitsilli akii taamanikkussamut 13 procentip missaanik akisunerussapput.

- Kaaviiaartitsinerput iluatsissappat taamaaliortariaqarpugut, Arctic Umiaq Linemi pisortaaneq, Jette Larsen, oqarpoq.

Angalanissamut pilersaarutit ukioq mannatut issapput, tassa imaappoq, Narsarsuarmiit Ilulissat tungaanut angalasassaaq, nunaqarfiulli ataatsip tikinneqartalernissaa aamma inissaqartinneqarpoq. Qeqertarsuatsiaat angallammit tikinneqartalernissani qilanaarisinnaavaa, kisianni ukiukkuinnaq.

- Imaatigut aasakkut angallanneq Qeqertarsuatsiaarmiut isumagilluartaqigaat paasinikuuvarput, Jette Larsen oqarpoq.

Sarfaq Ittuup 2007-imi januaarip ulluisa aallaqqaataaniit pisiarinissaanik isumaqatigiissut

Air Greenland A/S-ip Royal Arctic Line A/S-illu novembarip ulluisa 20-anni atsiorpaat. Pisinermi aamma ilaavoq Arctic Umiaq Linemik ateqaannarnissaa.