Sarfaq Ittuk ajutoorpoq ilaasussat 800-it eqqugaassapput

Sarfaq Ittuk Danmark-imit nunatsinnut ingerlaartilluni ullaaq Skagen-ip avataani anorersuarsiortilluni igalaavi pingasut aserorput inuttarlu ataaseq annikitsumik ajoquserluni. Sarfaq Ittuk maannakkut Danmark-imut uterpoq, aquttarfimmilu ajoquserneq qanoq annertutiginersoq qaqugulu nunatsinnut ingerlaassanersoq suli ilisimaneqanngikkallarpoq. Maannakkulli qularnaarlugu paasineqareerpoq Sarfaq Ittuk poorskertinnagu nunatsinni angalalernavianngitsoq. angalanissaminnut inniminneereersimasut akileereersimasullu angalanissaraluatik pillugit Arctic Umiaq Line-mut saaffiginneqquneqarput. Sarfaq Ittuup angalasinnaajunaarnerani angalaniat 800-it missaanniittut eqqugaapput.

Arctic Umiaq Line-p pisortaanera Jette Larsen aperaarput, Sarfaq Ittup nunatsinni sinersorluni angalanissaanut kinguaattorneq qanoq sunniuteqassanersoq ?

Tassa naatsorsuutigivarput sapaatip akunnnera ataaseq imaluunniit marluk pingasulluunniit kinguaattuussasugut, poorski sioqqullugu aallartittussaassagaluaratta kisiat maannakkut ajoqusersimaneq pillugu nalunaarutaagallartut aallaavigalugit sapaatip akunneri pingasut tikillugit kingaattoorsinnaavugut. Massakkorluinnaq Sarfaq Ittumik inniminneereersimasut qanoq eqqorneqassanersut oqaatigineqarsinnaanngilaq, Jette Larsen oqarpoq. ”Aqagu Air Greenland suleqatigalugu misissuissaagut sutigut qanorlu aaqqissuisinnaanersugut, Air Greenland inissaqartitsinersoq, nalunngereerparput sapaatip akunnerani siullermi Sarfaq Ittummut ilaasussaagaluit 800-it eqqorneqartussaasut, uagullu umiarsuarmik angallaneqarsinnaanerinik periarfississinnaangilagut Jette Larsen oqarpoq. Timersoriat poorskisioriartussallu eqqorneqarput. Air Greenland inissaqartitsinersut apeqqutaalluinnarpoq, Arctic Umiaq Line-imik angalanissaminnik inniminneereersimasut angallanneqarsinnaanersut, Arctic Umiaq Line-p pisortaanera Jette Larsen oqarpoq.

Sarfaq ittummut angalasussaagaluit pillugit Arctic Umiaq Line timmisartortitseqatigiiffimmik Air Greenland-imik isumaqatiginninniarnini aqagu aallartissavaa, Jette Larsen-illu ilanngullugu oqaatigaa umiarsuarmik ilaaniarlutik inniminneereersimasut akileereersimasullu, Air Greenland-ip timmisartuinut ilaanissaminnut Air Greenland-imi akigitinneqartut akiliutigissariaqassagaat.