Sarah Palin oqallisigineqarluarpoq
Ataatsimeersuarnermili oqallisigineqarnerpaasoq tassa partii sinnerlugu præsidentinngorniartussamut sinniisussatut toqqarneqartoq, Alaskami guvernøri, Sarah Palin.
Republikanerit talerperliuniartortaannut upperisarsiortunut tulluartillugu Sarah Palin toqqarneqaraluarpoq, maannali upperisarsiortut nuannarinngisaannik paasineqarpoq Palinip pania 17-nik ukiulik maanna naartulluni qaammatit tallimanngorai. Tamatuma kinguneranik qinersisartut Palinip sinniisissatut toqqarneqarneranik apeqqusiisalerput allanillu isertuussaqarnersoq annilaanngatigalugu.Maannakkorpiaq Sarah Palinip qatanngummi uiminiit avinneranut atatillugu atorfimminik atornerluisimasutut pasineqarnera suliarineqarpoq, taassumalu saniatigut Palinip uia imigassartorsimalluni biilersimasutut, ukiut 22-t matuma siornatigut unnerluutigineqarsimavoq. Tassa Palinimut atatillugu isorineqarsinnaasut ullumikkut nalunngisavut. McCainip tapersersortaasalu Palinip paniata naartunera nalunagu oqaatigaat, suliassaanulli attuumassuteqanngimmat soqutigisimannginnerarlugu. Taamaakkaluarpalluunniit qinersisartunut tamatuma paasissutissiissutiginera iiuminarnerusumik saqqummiunneqarsimasinnaagaluartoq isumaqartoqarpoq. McCainip sinniisussarsiornerani Palinimut tungasunik misissuiartortut Alaskaliarlutik paasisassarsioramik ilaatigut apeqquterpasuit akisassai immersortippaat. Taassumalu saniatigut oqarfigalugu annertoorujussuarmik sammineqalertussaassasoq, isertuussaqarsinnaassanngitsoq, pinngitsooranilu apeqqutigineqartunut suugaluartunulluunniit eqqortumik akisariaqartassasoq. Alapernaatsut isumaqarput Alaskamut misissuiartortitat mianersorpallaarsimasut, sinniisussatullu soqutigineqarnera isertuukkusullugu Palinip inuuneranut tunngasut qaqilerusussimanngikkaat. Maannali suli Republikanerit Alaskamiititaqarput, arlaannik Palinimut saassutarinnittoqalissagaluarpat piareersimasunik.
Sarah Palinip uia Todd, affarmik naggueqatigiinnit Inunneersuuvoq, Alaskamilu snescooterinik sukkaniunnermi isorartunerpaami ajugaanikuulluni. Taamaattumillu meerai ilaatigut snescooterit mærkiat Polaris atsiullugu atserneqarsimapput.
