Sarah Palin amerikamiut nuannarilluinnarpaat
Sarah Palin qinersinermi ajorsaraluarpoq, taamanikkuminngaanniilli anguniagai annertusiartuinnarsimallutik.
Rockimik erinarsortartutut isumaqarfiginarsinnaagaluartoq tamanna isumaqatigiissutip isertortup qulaarpaa.
Sarah Palin oqalugiartussanngoraangat puilasup ernga puiaasat marluk pisariaqartarput. Taavalu milluaat, peqeriarnertalik taamaattunnguaq. Tamanna arnap ukiup affaata siornatigut USA-mi præsidentip tulliatut qinigaasinnaasup piumasaatut suunngikkaluaqaaq.
Kisiannili tassa Det Hvide Husimi inissaqanngilaq - taamaattorli kusanartuusariaqarpoq. Tamatumani milluaat puilasullu ernga naammanngillat.
Tassami Amerikamiut Sarah Palin nuannarilluinnarpaat, aammalu arnap taassuma anaanaasutut nalinginnaalluinnartutut qitornaminillu hockeymik arsartunillu isiginnaariartunik biiliussinissamik nuannarisallip oqalugiarnera tusarnaarnialugu ½ mio. kr.-inik akiliiumasinnaallutik. Sarah Palinillu politikkimik, soorlu nunanut allanut politikkimik, imatorsuaq ilisimasaqannginnerminik arlaleriarluni takutitsisarnera Amerikamiunit soqutigineqanngilaq. Arlalippassuarnit nuannarineqartorujussuuvoq, pissutigigunarlugu tullianik qinersisoqalerpat præsidentitut qineqqusaarluni sassarnissani isumaliutigimmagu.
Maannalu tamanna qilanaaraa, tassami ataatsimiittuni oqalugiassatilluni puilasup ernga kisiat piumasariunnaaramiuk.
Universitetimi oqalugiarfigisassaani ilinniartut ataatsimoortut aviisip The Guardianip allaatigisaa naapertorlugu aaqqissuussinissamut tassunga isumaqatigiissutaa qimerloorsimavaat. Taanna siornatigut politikkimik suliaqarsimasup illumilu ningiup angerlarsimaannartup isumaqatigiissutaaninngarnit rockimik erinarsortartup isumaqatigiissutaanut eqqaanarneruvoq.
Tassami Sarah Palin aaqqissuussinermut tassunga timmisartumi pitsaanerpaamik issiaveqarluni imaluunniit Lear-jet-imik attartornissamut billetteqarluni angallanneqassammat. Ingerlaqqinnissaa limousinemik qernertumik pissaaq, hotelia pitsaanerpaassaaq, maannalu tassa fru Palinip hotelimi inissaq ataaseq inillu ataasiuttarissat marluk atortussaavai.
Akissaanillu isumaqatigiissutip tunuani Sarah Palinip aalajangersarsimasaani 75.000 dollarsit akilerneqassapput taakkualu saniatigut angallanneqarneq aningaasartuutillu allat akilerneqassallutik, DR taama tusagassiivoq.
