Sara: Palæstina naalagaaffittut akuerisaasariaqarpoq
- Ersoqataanermik misigisimaneq aallaavigalugu taama siunnersuuteqarpugut. Ukiuni amerlasuuni uagut kalaallit nammineerluta naalagaaffimmit allamit aqunneqarnikuuvugut. Ukiunilu kingullerni sulissutigilerparput naalagaaffimmit avissaarnissaq siunertaralugu, Sara Olsvig aviisimut Arbejderenimut oqarpoq.
Naalakkersuisooqatigiinnermut tunngavissat ilagigaluarpaat, Palæstinap naalagaaffittut akuerineqarnissaanik siunniussineq, taamaakkaluartoq siunnersuutigineqartoq folketingimi akuerineqassanngitsoq ilisimaneqarpoq. Tassami EU´p Naalagaaffiillu Peqatigiit nalunaarutigiumaagaat partiit naalakkersuisooqatigiit utaqqeqqaarniarmassuk.
- Danmarkip namminersuutigalugu Palæstina naalagaaffittut akuerissagaluarpagu, Naalagaaffiit Peqatigiit iliuuseriniagaannut akornusersuissagaluarpugut, Socialdemokraatit nunanut allanut tunngasunut oqaaseqartittagaat, Jeppe Kofoed aviisimut Arbejdernimut oqarpoq.
Naalagaaffiit Peqatigiit nunat ilaasortaasa 193-iusut ilaat 129-it, Palæstinap naalagaaffinngornissaanut akuersaarput, taakkunannga Island kingulliulluni akuersaartuulluni.
