Sara Olsvigip siulittaasussatut qinigassanngortinnini nalunaarutigaa

- Sukumiisumik isumaliutigereerlugu aalajangerpunga Inuit Ataqatigiit siulittaasussaattut qinersinissamut sassarniarlunga. Nunatsinni politikkikkut ataatsimoornermik suleqatigiinnermik pilersitseqataanissannut misigisimavunga siunnerfeqarlungalu, Sara Olsvig, tusagassiuutinut nalunaarummi ilaatigut allappoq.

Nunatta isumaginninnikkut nunallu immikkoortuisa akornanni nammaqatigiissagaanerusumik ineriartortitsisoqarnissaa, Sara Olsvigip, maanna Aasianniittup, sulissutigerusuppaa, soorlu aamma politikkikkut siammasissumik suleqatigiittoqarnissaa sulissutigerusukkaa:

- Partiit akornanni suleqatigiinnissamik siunniussaqarpunga, suliassaqarfiillu minnerpaamik pingasut suleqatigiiffigineqarnissaat siunertaraara. Suliassaqarfiit tassaapput: Atugarissaarnermut politikki, aalisarnermut politikki aatsitassarsiornermullu politikki. Politikkikkut suliassaqarfiit pingasut uani taakkartukkakka tassaapput inuiaqatigiinnitsinni tunngaviulluinnartut. Tassaapput ullumikkut inuiaqatitta qanoq innerannik sinaakkusiisut aningaasarsiornitsinnillu tunngaviliisut, Sara Olsvig allappoq.

Inuit Ataqatigiit partiiusoq angisooq oqaatigaa, kattuffiullu nukittorsarneqartuarnissaa siulittaasunngorumaartussap suliassaasa pingaarnerit ilagigaat oqaatigalugu. Immikkoortortaqarfinnut tamanut attaveqarnerup taamaammat nukittorsarneqarnissaa sulissutigerusuppaa.

Inatsisartunut kingullermi qinersisoqarmat Inuit Ataqatigiit qinersinerit pingajorarterutaannik pissarsivoq, Sara Olsvigilu Inuit Ataqatigiit siulittaasuattut maajip ulluisa 30-anni ataatsimeersuarnermi qinerneqassagaluaruni, Folketingimi ilaasortatut tunuarniarluni nalunaaruteqarpoq, Folketingip ukiaru ataatsimiilinnginnerani tunuarnissani pilersaarutigalugu.

- Sapinngisara tamaat piffissaq annertooq nunatsinni angalanermut atorusuppara tunuliaquttatsinnut innuttaasunullu tamanut patajaatsumik attaveqarluarnissarput siunertaralugu, Sara Olsvig, tusagassiuutinut nalunaarummi ilaatigut allappoq.