Sara Olsvigip Pinerluttunik Isumaginnittoqarfimmi assigiimmik akissarsiaqartitsinissaq kissaatigaa

Kalaallit Nunaanni isumaginninnermut siunnersortit, isumaginnittoqarfimmi ikiortinut tunngatillugu qaammammut 4600 koruunit missaannik akissarsiakinnerupput, isumaginnittoqarfimmilu fuldmægtigit qaammammut 6300 koruuninik akissarsiakinnerullutik. Aamma soraarnerussutisiat assigiinngillat, Danmarkimi 18 procentiupput Kalaallit Nunaanni 6,4 procentit.

-Tamanna akuerineqarsinnaanngilaq. Akisussaaffeqarfimmi ataasiuvoq, susassaqarfimmilu tamarmi pissutsit assigiittariaqarput, folketingimut ilaasortaq Sara Olsvig oqarpoq.

Danskittaaq folketingimut ilaasortaasut Pinerluttunik Isumaginnittoqarfik pillugu isumaqatigiissuteqarnermi kingullermi Kalaallit Nunaannik isiginiagaqarsimannginnerat uparuarpaa.

-Politikerit Pinerluttunik Isumaginnittoqarfimmut aningaasanik immikkoortitsinissamut akisussaasuusut Kalaallit Nunaanni Pinerluttunik Isumaginnittoqarfimmut, Danmarkiittumut naleqqiullugu taama ersaritsigisumik appasinnerusumik atugaqarfiusumut, aningaasanik amerlanerusunik tunniussisimannginnerat ingasappallaaqaaq.

Sara Olsvig Kalaallit Nunaanni Pinerluttunik Isumaginnittoqarfik pillugu danskit inatsisinik atortitsinermut ministerianik arlaleriarluni ataatsimeeqateqarsimavoq, oqaloqatigiinnertik pitsaasuunerarpaa, naak sulinerup ingerlarnga arriippallaarnerarlugu isornartorsioraluarlugu. Peqatigitillugu Inatsisartut Inatsit atortinneqarnerannut ataatsimiititaliaata Folketingillu Eqqartuussiveqarneq pillugu ataatsimiititaliaata  sutigut annertunerusumik suliniuteqartoqarnissaa pillugu suleqatigiinnissaannik siunnersuuteqarpoq.

Isumaginninnermut siunnersortinut KiF-qarfinni atorfeqartunut Kalaallit Nunaanni akissaatitigut isumaqatigiissuteqanngilaq. Taamaammat atorfeqarnermi atugassarititaasut sulisunut ataasiakkaanut isumaqatigiissuteqarfigineqartarput, danskit Inatsisinik atortitsinermut ministeriata Sara Olsvigimut allakkamini paasissutissiissutigaa. Inatsisinik atortitsinermut ministeri Morten Bødskov Kalaallit Nunaannilu Pinerluttunik Isumaginnittoqarfik ullumikkut oqaaseqartissinnaasimanngilagut.

Pinerluuteqarsimasunik inissiisarfinni paarsisut tapersersortaasullu akissarsiatigut assigiinngitsunik akissarsiaqartinneqarnerat siornatigut aamma oqallisaasimavoq. Danmarkimi Kalaallit Nunaannilu tapersersortaasut akissarsiaasa assigiinngissutaat ukiumut 1100 koruunit missaaniippoq. Pinerlussimasunullu inissiisarfinni paarsisut akissarsiaannut tunngatillugu assigiinngissutaasoq qaammammut 5000 koruunit sinnerpaa.