Sara Olsvigip isumaqatiginninniarsinnaaneq pingaartippaa

Taamatuttaaq atugarissaarnermut, aalisarnermut aamma aatsitassanut politikki suliassaqarfittut pingaarutilittut taavai. Partiip aaqqissuussaanikkut nukittorsarnissaa suliassanut pingaarutilinnut aamma ilaasoq Sara Olsvig oqarpoq:

-Politikkikkut suleqatigiinnerulernissaq partiillu aaqqissuussaanermigut nukittorsarnissaa siunertaralugit qinigassanngortippunga.

Sara Olsvig oqarportaaq, partiit tamat akornanni suleqatigiinnissamik siunniussaqarluni, naalakkersuinikkulli oqallinnerit qiviaraanni partiit naalakkersuisuutitaqartut illuatungiliuttullu annertuunik isumaqatigiinngissuteqarsinnaasarnerat ilisimaarinerarpaa.

-Isumaqatiginninniarsinnaaneq isumaqatiginninniarnermilu tunniussaqarsinnaaneq, partiimut siuttuugaanni assannik isaassisinnaaneq suleqatiginnikkusussutsimillu takutitsisinnaaneq pingaaruteqarput, taakku amigaatigineqarsimagunarput, Sara Olsvig nassuiaavoq.

IA-p siulittaasuatut tunuaqqammersoq, Kuupik V. Kleist, Inatsisartunut siorna qinersinermi taaguunneqarnerpaat tulliattut inissippoq. Sara Olsvig Inatsisartunut siorna iserpoq, tamannalu sioqqullugu Folketingimut 2011-mi iserpoq. Sara Olsvig aperaarput Kuupik Kleistimut naleqqiulluni suut nukittuffiginerunerai, imalu akivoq:

-Inuttut assigiinngilagut, nutaanik nukeqarpunga inuusunnerulaarlungalu. Politikkimik isiginnittaasera nutaajunerulaarpoq allaanerulaarluni.

Suleqatiginnikkusussuseq tunngavigalugu sassarninni nipi atugara allaanerummat maluginiarneqarsimassaaq. Siulittaasorisimasarput angusarpassuaqarnikuuvoq. Partii aatsaat taama ilaasortaqartigaaq partiitullu aatsaat taama angusaqartigisimalluni, tunuarnerata kingorna pissutsit nutaat aamma takkukkumaarput.

Inuit Ataqatigiit immikkut ittumik maajip 30-ani ataatsimeersuassapput, tassanilu siulittaasussamik qinersissapput.