Sara Olsvigip Danmarkimi aningaasaqarnermi ministeri oqaloqatigaa
Kalaallit politikerii atsaat taama aningaasaqarnermi inatsimmi isumaqatiginniniarnermi pingaaruteqartigalutik inissisimapput. Taasititsisoqarneranimi kalaallit folketingimi qinikkat taasinerannik amerlanerussuteqarnissaq pisinnaavoq, tamannalu pissappat Helle Thorningip kalaallit folketingimut qinikkat taasineri atorfissaqartissavai. Taamatullu inissisimaneq Sara Olsvigip atorluarniarpaa.
-Inatsisiliortuni suleqataavugut, kalaallillumi nunatsinnut sullissinissamik angusaqarusoqaagut. Eqqartuussiveqarnermut tunngassuteqartunik suliniuteqarpunga, isumagami malillugu tamanna qallunaat naalakkeruisuinit isiginiarneqanngippallaarpoq. Pinerlussimasummi parnaarussivinniittut sulisullumi Kalaallit Nunaanniittut ajunnginnerusumik atugaqartariaqarput, Sara Olsvig knr.gl-mi taama oqaluttuarpoq.
Ukiup ingerlanerani Sara Olsvig ministerinik assigiinngitsunik naapeqateqartarsimavoq, nammineerlunilu isumaqarpoq IA-minngaanniit kissaatigineqartut erseqqissumik naapeqatigiinnerni oqariartuutigisarlugit. Aningaasaqarnermullu inatsisissamut tunngatillugu Bjarne Corydon naapisimaarsimavaa, tamannalu aningaasaqarnermut inatsisisammut 2013-moortumut suleqataaneruvoq.
-Aningaasaqarnermut ministeri oqaloqatiginerani ammasorujussuarmik pissuseqarpoq, isumaqarpungalu suliassani assigiinngitsuni Kalallit Nunaannut tunngassuteqartuni sunniuteqangaatsiassalluta. Pissangagisamalu ilagaat Kalaallit Nunaanni anaassiniarnermi ikiuigasuarnissallu eqqarsaatigalugit pitsanngorsaaniarnermi aningaasat qanoq amerlatigisut atorneqassanersut tusarnissaat, Sara olsvig taama oqarpoq.
