Sara Olsvig saamerlernit pilerngunneqarpoq
SF-imi aqutsisut Sara Olsvig, Inuit Ataqatigiinneersoq, ullumi ataatsimeeqatiginiaraat, partiip Folketing gruppiannut ilanngunnissaa anguniarlugu.
Pissaanermik, ataatsimiititaliat suliassaannik ministeriunermullu tullersortaanissamut tigusiniarluni unammineq taamaalilluni sakkortusissagaluarpoq.
Danmarkimi aviisini tusagassiuutinilu allassimasut naapertorlugit, partiip siulittaasua, Villy Søvndal, SF-imilu gruppimi ilaasortat sinneri, Sara Olsvigip suleqatigerusussinnaavai.
- SF-ip gruppianut ilanngunnissara soqutigaa, tamannalu teknikkikkut qanoq aaqqissinnaaneripput paasiniarlugu ullumi naapeqatigiissaagut. SF-ikkut iluaraavut, ikinngutivullu soorunami ikiorusuppavut. Kisianni kiffaanngissusitsinnit tuniserusunngilavut, Sara Olsvig aviisimut Jyllands-Postenimut oqarpoq.
Aviisimilu allassimasut naapertorlugit tamanna ima aaqqinneqarsinnaavoq Sara Olsvig SF-ip Folketingsgruppianut ilanngussinnaasoq. Tamanna pissappat tamakkiisumik ilaasortaassanngilaq immikkullu isummiussinissaminut pisinnaatitaassalluni.
