Sara Olsvig Nunat issittut inatsisartuisa ataatsimiititaliaanni siulittaasussatut qinerneqarpoq
- Nunat issittut inatsisartuisa suleqatigiinnerat Kalaallit Nunaannut Danmarkimullu pingaaruteqartumik oqalliffiuvoq, tulluusimaarutigeqaaralu siulittaasussatut qinerneqarama, Sara Olsvig oqarpoq.
Nunat issittut inatsisartuisa ataatsimiitsitaliaat nunanit ukunannga ilaasortaaffigineqarpoq: USA, Canada, Rusland, Finland, Sverige, Norge, Island, EU parlamentet aamma Naalagaaffeqatigiit (Danmark, Kalaallit Nunaat, Savalimmiut), kiisalu assigiinngitsunik alapernaarsuisoqarluni. Aammattaaq Nunat issittut inatsisartuisa ataatsimiitsitaliaat nammineq Issittumi Siunnersuisoqatigiinni alapernaarsuisutut inissisimavoq, ukiullu ingerlanerani ataatsimiititaliaq 3-4-riarluni ataatsimiittarpoq, ukiorlu allortarlugu ataatsimeersuartarlutik. Nunat issittut inatsisartuisa ataatsimiitsitaliaat nunat issittut naalakkersuisuinut siunnersuusiortarpoq, ukiullu ingerlanerini ingerlaavartumik Issittup ineriartuiffigineqarneranut atatillugu inunnut tunngasut pingaartitaralugit suliniuteqarfigisarpai. Sara Olsvigip Folketingi sinnerlugu Nunat issittut inatsisartuisa ataatsimiitsitaliaanni ilaasortaavoq.
- Nunat issittut inatsisartuisa ataatsimiitsitaliaanni malugisinnaavarput Issittoq qanoq soqutigineqariartortigisoq, uagullu inatsisartuni parlamentarikeriusugut pingaartilluinnarparput issittuni innuttaasut oqartussaaqataasuunissaat, aamma naalagaaffeqarneq eqqarsaatigalugu. Taamaammat nuannaarutiginerpaavara Danmark/Kalaallit Nunaallu maanna parlamentarikerini suleqatigiinneq siuttuuffigilissagatsigu, Sara Olsvig oqarpoq.
Kalaallit Nunaata Issittumi Siunnersuisoqatigiinni ataatsimiinnermut peqataasoqarani mattussinera Nunat issittut inatsisartuisa ataatsimiitsitaliaanni Svalbardimi ataatsimiinneranni eqqartorneqarpoq, ataatsimiititaliamilu isumaqatigiissutigineqarpoq peqataannginneq pillugu ataatsimut oqaaseqaatiliorniarlutik. Oqaaseqaammi ataatsimiititaliap eqqaavaa Kirunami ministerit ataatsimiinneranni Kalaallit Nunaata peqataasimannginnera, neriuutiginerarlugulu Kalaallit Nunaat siunissami Issittumi Siunnersuisoqatigiit sulinerannut peqataaleqqikkumaartoq.
- Ataatsimiinnitsinni Kalaallit Nunaata inissisimanera saqqummiuppara siunnersuutigalugulu tamanna pillugu oqaaseqaatiliussasugut. Mattussineq ullut ingerlanerini eqqartuiffigisimavarput, nuannaarutigaaralu maanna ataatsimiititaliamit ataatsimut oqaaseqaatiliornissamut isumaqatigiissimagatta, Sara Olsvig naggasiivoq.
Nunat issittut inatsisartuisa ataatsimiititaliaat 1993-imi pilersinneqarpoq Nordisk Rådip siunnersuutaa malillugu, ukiullu ingerlanerini Issittumi assiginngitsutigut malunnaatilinnik sunniuteqartarsimavoq. Ataatsimiititaliaq issittuni universitetit suleqatigiinnissaanik University of the Arctic pilersitsinissamut aallarneeqataasimavoq. Ataatsimiititaliaq aamma Issittumi Siunnersuisoqatigiit 1996-imi pilersinneqarnerani suleqataalluni peqataavoq.
Nunat issittut inatsisartuisa ataatsimiititaliaanni ataatsimiinneq Longyearbyenimi ingerlanneqarpoq 3. Juni, nunarsuullu avannarpasinnertaatut najugaqarfiusumi Ny Ålesundimi silarluk pissutigalugu 4. Aamma 5. Juni ataatsimiititaliap ataatsimiinnini nangippaa.
Ataatsimiititaliap ataatsimiinnissaata tullia Mumanskimi Ruslandimi pissaaq septembarimi. Olsvig ataatsimiittoqareerpat pisortatigoortumik siulersuisunngussaaq, taamanikkornissaatalu tungaanut ataatsimiititaliami siulittaasup tulliatut sulissaaq.
Sara Olsvigip siulittaasunngornissaa pillugu nalunaarut ataatsimiisitaliallu Kalaallit Nunaata Issittumi Siunnersuisoqatigiinnut peqataajunnaarnera pillugu oqaaseqaataa ataatsimiisitaliap nittartagaani www.arcticparl.org-mi atuarneqarsinnaapput.
