Sara Olsvig-ip nunarput aningaasanik amerlanerusunik tunineqarnissaa sulissutigaa
Ataatsimiinnermi sammineqartut ilagaat nunani issittuni universitetit suleqatigiinniarneri. Danmarkip University of the Arctic piffissami 2010-miit 2012-imut ukiumut 3 million koruuninik tapiiffigisarsimavaa. Danmarkimi aningaasartuutissanut inatsisissamut siunnersuutigineqartumi siunissaq eqqarsaatigalugu University of Arctic-ip aningaasaliiffigineqartarnissaa ilaanngilaq. Tamannalu IA sinnerlugu Folketinngimut ilaasortap iluarinngilaa.
-Nunat issittut akornanni universitetit suleqatigiinnertik nukittorsarneqarnissaanut neriuuteqarnerat ministerip paasilluarsinnaavaa, kisianni neriorsunngilaanga aningaasanik amerlanerusunik tamatumunnga tunniussisoqassasoq. Siunissarli eqqarsaatigalugu neriunartoqarpoq. Ministerip neriorsorpaanga akuersaarpalaartumik isiginiassallugit. Taava aningaasartuutissanut inatsitsissap inaarsaarlugu isumaqatigiinniartoqarnerani ukioq manna kingusinnerusukkut aaliangiiffigineqarumaarput. Isumaqarnera aningaasat amerlanerusut tunniunneqassasut naqissuserpara, taama Sara Olsvig knr.gl-imut oqarpoq.
Ukiut arlallit illuatungiliuttooreerlutik ukioq manna kalaallit Folketinngimut ilaasortaatitaat naalakkersuisunut tunuliaqutaapput, taamaalilluni aningaasartuutissanut inatsit suliarineqarnerani sunniuteqarsinnaapput.
Sara Olsvig-ip illersornissamut ministerimut, inatsisinut atortitsinermut ministerimullu allakkatigut apeqquteqaatinik nassiussisarsimavoq, massakkullu akissuteqarnissaat utaqqivaa.
-Ulluni makkunani akissuteqarnissaat utaqqivara. Pissanganassaaq tusassallugu inatsisinut atortitsinermut ministerip Morten Bødskov Kalaallit Nunaanni eqqartuussiveqarnerup nutarteqqinneqarnissaa pillugu apeqquteqaatikka qanoq akissanerai. Aningaasartuutissanut inatsisissatut siunnersuummi allaqqanngilaq aningaasat qanoq amerlatigisut eqqartuussiveqarnerup aaqqissuusseqqinnissaanut tunniunneqassanersut, kisianni ilimagivara 10 million koruunit tunniunneqassasut. Kalaallit tungaaniit tamakkuupput pingaartinneqartut, neriuutigaaralu ilimagalugulu aningaasat nassaarineqassasut. Kisianni aningaasat pisariaqartinneqartut tunniunneqanngippata pilersaaruteqanngilanga aningaasartuutissanut inatsit taasissutigineqalerpat akerliullunga taasinissannut, kisianni soorlumi massakkut naalakkersuisuusut, Folketinngimi naalakkersuisunut tunuliaqutaaqataasut aamma naammagisimaarinninnissaat sulissutigerusussagaat, taama Sara Olsvig oqarpoq.
