Sara Olsvig: Inuusuttut ersoqatigiinneq pillugu ilinniartinneqartariaqarput

- Sulisartu kattuffiisa ilarpassui kalaallit ersoqatigiinnissamik misigisimanerannit innuttaasunullu pitsaasunik atugaqartitsinissamut piumassuseqarnerannit aallaaveqarput. Naleqartitat taakkua paarilluassavagut, kinguaariinnilu takkuttussani ersoqatigiinnikkut ingerlaaseqarnissatsinnut paasinninneq paasillugulu atoqqullugu maannangaaq meeqqatsinnut inuusuttortatsinnullu ingerlateqqissavagut, Sara Olsvigip, Sulisartut Ulluannut atatillugu oqaaseqarnermini oqaatigaa.

SIK-p inuusuttunut immikkoortortaqarnera Inuit Ataqatigiit nuannaarutigaat, peqatigitilluguli aamma isumaqarput sulisitsisut inuusuttunut meeqqat atuarfianni angajullerniittunut ilinniagaqartunullu naleqartitaminnut ilisimasaminnullu tunngatillugu annertunerusumik paasissutissiisarsinnaasut:

- Ersoqatigiilluni ingerlaaseqarnissamik isumaq inuusuttunut ingerlateqqissavarput, taamaasilluta inuiaqatigiinni naleqartitap tamassuma siunissami qitiusutut atuussinnaanissaa pigiinnarsinnaagatsigu, Sara Olsvig oqarpoq.

Inuiaqatigiinni naligiinngittoqarneq Naalakkersuisunit iliuuseqarfigineqanngitsoq oqaatigalugu Sara Olsvig aamma isornartorsiuivoq:

- Inuiaqatigiinni naligiinnginneq annertusiartorpoq, Naalakkersuisoqarpugullu naligiinnginnermut tamatumunnga maanna tikillugu malunnaatilimmik iliuuseqarsimanngitsunik. Akerlianik siusinaartumik pensionisiaqarnermut aaqqissuusseqqinnermi maanna siunnersuutigineqartumi inuit amerlanerusut pilersorneqarnermiit suliffeqarnermut inunnik taakkuninnga tigusinissaminnut suli piareersimanngitsumut suliffeqarnermi atukkanut nalorninartunut kaaminneqassapput, Inuit Ataqatigiit siulittaasuat Sara Olsvig maajip aallaqqaataanut atatillugu taama ilaatigut allaaserisaqarpoq.