Sara Olsvig: Inatsisartuni qarasaasiatigut aallagarsiat kikkunnilluunnit iserfigineqarsinnaaneri ajornanngitsuararsuuvoq.

- Taamaattumik isumaqarpunga, Nunatsinni qanoq iliuuseqaqqittoqarsinnaasoq aamma tamanna eqqartoqqinneqartariaqartoq, qanoq ililluta qarasaatiatigut sillimiarnerput pitsanngorsarneqarsinnaanersoq.

Sara Olsvig Christiansborgimiisinnani qarasaasiatigullu allagarsiani atuarniarunigit, taava isumannaallisaanerit arlallit aqqusaaqqaarlugit isissutissamillu ataasiaannarlugu atugassamik aatsaat pissarseqqarluni allagarsiani atuarsinnaavai.

- Illuatungaatigulli Inatsisartuni qarasaasiatigut allagarsiakka atuarniarukkit, taakku imaaliallaannapajaarlunga iserfigisinnaavakka. Taamaattumik Inatsisartuni qarasaasiatigut allagarsiat atuarniarniarneranni taakku innarlerneqarsinnaanerinut upalugaarsimanerput folktingimut naleqqiullugu qanoq assigiinngissuteqartiginersut takusinnaavakka.

Inatsisartuni ilaasortat aamma oqartussani atorfillit, qarasaasiatigut aallagarsiaasa imaaliallaannaq atuarneqarsinnaaneri, Sara Olsvigip ernumanartutut isiginerinut pissutaaneruvoq, Nunatsinni politikerit aamma Nammisorlutik Oqartussani qaffasissumik atorfillit aamma aatsitassarsiornermik suliaqartut, amerikamiut kilitsissiaannit, NSA-mit nakkutigineqarnersut, Qallunaat illersornissaq pillugu ministeriannut, Nicolai Wammneimut apeqquteqaateqarnermini, taassuma akissummini oqaatigimmagu, Danmarkip issittoq pillugu sulinera isertortumik nakkutigineqartutut nalilerneqartariaqarmat.

- Illersornissaq pillugu ministerip akissutaa ima paasivara, soorunami Nunatsinni isertortumik malinnaaffigineqartugut aamma ingammik Danmarkip issittoq pillugu suliaannut malinnaaneq annertoorujussuussagatikkaa paasitinneqarlunga.

Folketingimi aamma Inatsisartuni ilaasortaq, Sara Olsvig taama oqarpoq.