Sara Olsvig: Avaleraasartuut pillugit isumaqatigiissut kalaallit soqutigisaannut naapertuutinngilaq

IA-p Folketingimut ilaasortaatitaa Sara Olsvig Atlantikup avannaata imartaani avaleraasartuunik kalaallinut pisassiissutaasut pillugit danskit inuussutissalerinermut ministeriannut Dan Jørgensenimut (S) arlalinnik apeqquteqaateqarpoq.

Savalimmiut, Norgep EU-llu isumaqatigiissutaat naapertorlugu nunat taakku kalaallit avaleraasartuunik pisassiissutaannik, isumaqatigiissutip avataaniittunik, aalisarsinnaatitaassanngillat.

Sara Olsvigip ilaatigut paaserusuppaa isumaqatigiissutaasoq kalaallit avaleraasartoorniarnermi periarfissaannut qanoq sunniuteqassanersoq, siornatigummi angallatit EU-meersut suleqatigineqartarmata.

- Isumaqatigiissutip Kalaallit Nunaannut naleqqutinngitsuunera ernumassutigaara. Savalimmiunut iluaqutaasussamik Kalaallit Nunaannulli naleqqutinngitsumik isumaqatigiissuteqartoqarsimappat Danmark ajornartorsiuteqalissaaq, KNR-imut taama oqarpoq.

Isumaqatigiissutip Kalaallit Nunaannut qanoq kinguneqarnissaanik danskit naalakkersuisuisa qanoq naliliinersut danskit inuussutissalerinermut ministeriannut nassuiaateqarfigeqquaa.

Folketingip Europami pissutsinut ataatsimiititaliaani ippassaq ataatsimiittoqarnerani suliaq naatsumik eqqartorneqarpoq:

- Kalaallit Nunaata kommissionillu akornanni apeqqut taanna pillugu oqaloqatigiinnerit pitsaasuupput. Kingusinnerusukkut tamanna uterfigeqqissinnaavara, inuussutissalerinermut ministeri taamatuinnaq oqarpoq.

IA aamma Naalakkersuisunut apeqqutinik arlalinnik piareersaaleruttortoq Sara Olsvigip oqaatigaa.

- Kalaallit Nunaata isumaqatigiissummut ilaannginnermigut arajutsisaqarsimanissaa ernumassutigaara, taama oqarpoq.

KNAPK-ttaaq isumaqatigiissut nutaaq ernumanartoqartippaa kusanaatsuliornertullu taallugu.

- Umiarsuaateqarfiit nunanit allaneersut avaleraasartoorniarnermik ilisimasallit isumaqatigiissuteqarfigineqarsinnaanngippata, kalaallit avaleraasartuunik 100.000 tonsinik aalisarnissaannik anguniagaasoq piviusorsiortuussanngilaq, kattuffik tusagassiorfinnut nalunaaruteqarluni taama allappoq.

Norgep, EU-p Savalimmiullu isumaqatigiissutaat naapertorlugu Island Kalaallit Nunaallu avaleraasartuunik 42.527 tonsit sinnerlugit aalisassanngillat - tassa NEAFC-kkunnut pisassiissutinik taaneqartunik. Island kisimiilluni siorna 90.000 tonsinik pisaqarsimavoq.

- NEAFC pisassai pillugit sorsuttoqangaatsiarnissaa siulittuutigiinnarsinnaavarput, KNAPK-mit taama oqaatigineqarpoq.  

Kalaallit Atlantikup avannaani ukiut sisamassaannik misileraammik avaleraasartoorniarput. Ukiullu tallimat aalisarsimanermik takutitsisinnaaneq atorneqarajuppoq nunap aalisakkamik aalisarfiujuartutut nalilerneqarnissaanut taamalu pisassanik aalajangiiniarnerni peqataanissaanut, KNAPK taama naliliivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat