SAR-imut isumaqatigiissut sivitsorneqartoq
Tamannalu Issittumi Sakkutooqarfiup Air Greenlandip qulimiguuliutai SAR-it 2018-imut aamma ingerlannissaanik isumaqarpoq, timmisartortitseqatigiit tusagassiutinut allapput.
- Issittumi Sakkutooqarfiup Air Greenland Kalaallit Nunaanni qulimiguulimmik upalungaarsimatitsineq pillugu pitsaasumik iluarisimaarnartumillu suleqatigaa. Tamanna Nuugaatsiami qarsutsisoqarneranut atatillugu annaassiniarnermi ilaatigut erserpoq, Issittumi Sakkutooqarfimmi pisortaq, generalmajor, Kim Jesper Jørgensen oqarpoq.
Inuinnarnut SAR-imut upalungaarsimatitsinermi S61 Kangerlussuarmi timmisartoqarfimmi ukiumi ullut tamarluinnarmik piareersimatinneqartarpoq.
Tamatuma saniatigut qulimiguulik Bell 212 Qaqortumi mittarfeqarpoq taannalu sapaatip akunneranut sapaat minillugu ullormut akunnerit arfineq pingasut piareersimasarluni.
Qulimiguullik taakku marluullutik hoist systeminik amooruteqarput taamaalilluni immap qaaniit, umiarsuarniit, umiatsianiit, qunnernit itisuuniit qaqqallu qaanniit inuit amuneqarsinnaapput.
Air Greenlandip Issittumilu Sakkutooqarfiup akornanni isumaqatigiissut ukioq manna decembarip 31-anut atuuttoq allannguiffiunani ukiumik ataatsimik sivitsorneqarpoq.