Saqqummiussaq Inuit Issittormiut Kattuffiata pakatsissutigaa
ICC-p Kalaallit Nunaanni immikkoortuani siulittaasoq Aqqaluk Lynge oqarpoq, nunarput ataatsimoorussamik avammut saqqummiussassaqartillugu Kattuffitsik tusarniaqqaartariaqartoq.
- Naalakkersuisut saqqummiussaat pakatsissutigaara, soorluuna saqqummiussami issittumi suleqatigiinnerup iluani aammalu naggueqatigiit inuit akornanni ukiorparujussuit oqallissimanermut tunngasut aallavigineqarsimanngitsut, Aqqaluk Lynge oqarpoq.
Taamaammat Naalakkersuisut saqqummiussaat oqallisigineqarnerusaraiqarsoraa, aamma ICC-p Naalakkersuisullu akornanni.
Kalaallit Nunaata maanna suliffissuarujussuaqanngikkaluarluniluunniit nunarsuup sinneranut pisussaaffeqarnera aamma puigoqqunngilaa. Naalakkersuisullu iliuuseqalertigatik tusarniaaqqaartarnissaat neriuutigaa.
- Aatsitassarsiornikkut allatigullu ingerlatsineq aalisarnermut piniarnermullu illuatungiliuttuupput. Uumassusilinnik uumassuseqanngitsunillu inuussuteqarneq assigiinngitsorpassuusinnaammata Kalaallt Nunaat sissuigassaqarpoq, nangippoq.
Mingutsitsineq nunatta avataani pisoq nunatsinnut sunniisoq aamma eqqaavaa.
- Nammineq aamma suliffissuarujussualiornissarput tikilluaqqussagutsigu aamma kingunissai eqqarsaatigisariaqarpavut. Silap allanngornerata qaavatigut uatsinnut sunniisussat annertussapput, taamaammat inuussutissarsiutigeriikkat aserornaveersaarlugit ingerlanissat aamma sorpassuit allat nalilersorluartariaqarput, Aqqaluk Lynge oqarpoq.
UNESCO, Naalagaaffiit peqatigiit ilinniartitaanermut, ilisimatusarnermut kulturimullu Suleqatigiiffiat silap pissussaa pillugu Københavnimi ataatsimeersuarnermi COP15-imi atuakkamik ippassaq saqqummersitsivoq. Atuagaq ilaatigut silap allanngoriartorneranik aamma piujuaannartitsineq tunngavigalugu Issittumi ineriartortitsinermik imaqarpoq. Saqqummiunneqarneranut atatillugu Aqqaluk Lynge Inuit silap allanngoriartornerata kingunerisaanik unammilligassat pillugit saqqummiivoq.
Atuagaq ateqarpoq "Climate Change and Arctic Sustainable Development", Kalaallit Nunaanniillu allaaserisat sisamaapput, ilanngussisuullutik ICC-mit Aqqaluk Lynge aamma Lene Kielsen Holm, Naalakkersuisuisunut siulittaasuusimasoq Jonathan Motzfeldt nunanullu allanut naalakkersuisoqarfimmeersoq Marianne Lykke Thomsen. Katja Nyborgip Københavnimit ilanngutassiaata kalaallisuua Najâraq Egedemit isumagineqarpoq.
