Saqqummersitsineq kulturministeriaqarfiup naalakkersuisullu naammagisimaarpaat

Nuimasut najuuttuupput Kalaallit Nunaata siunissaa pillugu saqqummersitsineq Venedigmi ammaanersiorneqarmat. Ammaasoqareersoq kultureqarnermut ministeri aamma naalakkersuisut Biennalen-mi najuutsitaat KNRip naapippai.

- Isumaqarpunga saqqummersitsineq kusanarlunilu eqqarsalersitsisoq aamma kulturministeritut isumaqarpunga isumassarsiorfigineqarsinnaalluartoq, kulturminister Uffe Elbæk oqarpoq.

- Suleqatigiinneq kalaallit qallunaallu pilersitaat pitsaasumik isumaliutigilluagaasumillu saqqummersitsinermik kinguneqarpoq tamannalu assut nuannaarutigaara. Una saqqummersitsineq Kalaallit Nunaannut tunngasuinnaanngilaq aammali tamatsinnut tunngassuteqarluni, Uffe Elbæk oqarpoq.

Biennalenimi naalakkersuisuni siulittaasup tullia Jens B. Frederiksen aamma najuuppoq.

- Suleqatigiinneq qallunaat kalaallillu suliffeqarfiisa aamma pisortat suliffeqarfiisa akornanni pisoq annertoorujussuuvoq aammalu uatsinnut aalajangiisartunut siunissamut sakkussanik tunniussaqarluni, Jens B. Frederiksen oqarpoq.

Taanna najuuttut arlallit assigalugit isumaqarpoq saqqummersitsinerup Kalaallit Nunaat saqqumilaartilluarumaaraa.

- Inuppassuit nunanit tamalaaneersut sorpassuarnik oqaluunneqarsinnaapput aallartitseqatigalugillu. Periarfissarli immikkuullarippoq nunatta saqqumilaartinnissaanut, Jens B. Frederiksen oqarpoq.

Dansk Arkitektur Center KNRip Venedig-mut angalaqataaneranut aningaasaliivoq.