Saqqaq tunitsivittaalerpoq

Allattoq Carla Davidsen
juulip 20-at 2005 07:39

Saqqami tunisassiorfiusimasup saniani toqqammavik ilisarnarsiartuaartoq tassaavoq nunaqarfiup tunitsivissaa nutaaq oktobarimi atulersussaq.

Saqqamiulli tunisassiorfeqarallaramik sulisorisat amerlaqataannik sulisoqarnissamik neriuuteqarsimagunik pakatsisinneqartariaqassapput, Royal Greenlandip pilersaarutigimmagu nunaqarfimmi tunisassiorfeqarunnaarluni tunitsiveqaannassasoq. Tunitsivimmilu amerlanerpaamik sisamanik tallimanilluunniit sulisoqartussaavoq.

Tunitsiveqaraanni aalisakkat tunineqartut tunisassiarineqaratik qeritiinnarneqartarput.

2002-mi februaarimi Saqqami tunisassiorfik ikuallanngikkallarmat Royal Greenlandimi sulisut qulit missaanniissimagaluarput.

Saqqami Royal Greenlandip tunitsivissaa sapaatip akunneranut 25 tonsinik tunisiffigineqartarsinnaassaaq. Royal Greenlandimiillu pissanngatigineqarpoq Saqqami tunitsivik oktobarimi ammaqqippat aalisartut siornatigutulli amerlatigissanersut.