Saqqaq kulturi pillugu ilisimatusaat nersornaaserneqartoq
Inuit nunatsinnut ukiut 4500-t matuma siornatigut tikittut, Saqqaq kulturi, professorip, itsarnisarsiuup, Bjarne Grønnowip ilisimatusaatigaa.
Julius Bomholt-prisen ilisimatusarnermi nutaaliortunut, sukumiisumillu ilisimatusaatinik suliniuteqartunut tunniunneqartarpoq.
Bjarne Grønnowip Saqqaq kulturi pillugu ilisimatusaataa suliarilluagaasoq, kultureqarnermut ministerip Mette Bockip oqaatigaa, oqaluttuarisaanermut pingaarutilittut taallugu:
AAMMA ATUARUK Saqqaq kulturip nalaani mersullaqqissuusimasut
- Saqqaq kulturip nalaani inuunermut tunngasunik pissarsilluarpugut, inuit isumassarseriallaqqissuunerat takutinneqarluni. Atortunik nutaanik pilersitsinikkut mersullaqqissuusimanerat , ineqarniarnikkut isumassarsiullaqqissuunerat inuussutissanillu pissarsiortarnerat pillugu paasisimasaqarnerulerluta, Mette Bock oqarpoq.
Julius Bomholt-prisen siullerpaamik 2012-imi tunniunneqarpoq. Nanortallip Katersugaasiviata pisortaata Kristine Raahaugep, Danmarkimilu katersugaasivissuarmi immikkut ilisimasallit Hans Christian Gulløv Einar Lund Jensenilu atuakkiaat Nunap Isuata eqqaani Kulturit naapinnerat taamanikkut nersornaaserneqarluni.