Saqisut: Sullivimmi atukkat aaqqiagiinngissutaapput
Illuatungeriik isumaqatigiinniarnermi sivisuumi tamarmi suniarnerminnik isertuusseqqajaasimapput. Isumaqatigiinniarnernulli attuumassuteqartut Radioaviisimut ullumi oqarput, aaqqiagiinngussutit immikkoortumut ataatsiminut allanneqarsinnaasut. Tassalu Air Greenlandip Danmarkimut timmisartuani saqisut qasssiussanersut, aammalu saqisut unillatsiartarnissaannut qasuersaanissamullu malittarisassat.
Aaqqiagiinngissut taanna isumaqatigiinniarnernikkut aaqqineqarsinnaasutut, Saqisut Peqatigiiffiata, ACU-p, kattuffigisaanit, Dansk Funktionærforbundimit, nalilernerpoq. Illuanilli Air Greenlandimit sulisoqarneq qasuersaarnermullu malittarisassat sullivimmik aqutsisussaatitaanermut tunngasutut isigineqarput.
Illuatungeriik paasissutissanik saqqummiinniaasaarmata, ajornartorsiut avataniittunut paasiuminaassinnaavoq. Kisianni assersuusioriarta. Saqisut imaanngilaq ilaasunut sassaalliginnartussat akitsuuteqanngitsunillu tuniniaaginnartusussat. Tassami pingaarnertut isumannaallisaanermik suliaqartussaapput. Assersuutigalugu timmisartorsuarni Air Bus-itut angitigisuni sillimaniarneq peqqutigalugu tallimanik saqisoqartussaavoq, Air Greenlandili Air Busiutimi aqqanilinnik saqisoqartarpoq. Tassalu piumasaqaatinit marloriaammik amerlanerit. Kisianni tamanna ilaasunik sullissinerup pitsaasuunissaanik tunngaveqarpoq.
Taamaalu amerlatigisunik saqisoqarnissaq Air Greenlandip saqisullu peqatigiiffiata isumaqatigiissutaanni tunngaviuvoq. Kisianni saqisut assersuutigalugu napparsimasoqarneq, kinguuaattorneq allalluunnit pissutigalugit ikilisariaqarpata taava qanoq pisoqassava?
Taava sullissinerup pitsaassusaa allanngortinneqassanngila? Air Greenland oqarpoq, Aap.
Aamma sulisut taama oqarusupput, aammali ullormut ilaatigut nalunaaquttap akunnerini 15-inik suliffiusartumi unillatsiartarnissamut periarfissaqarusupput. Aammattaaq ilaasunut sullissinerup pitsaassusissaanut piumasaqaatit appartinneqartassasut piumasaraat.
Tassalu aaqqiagiingissut. Air Greenland isumaqarpoq, saqisut sullissinnerup pitsaasuusaanut akuliuttussaanngitsut. Isumaqarput namminneq tamanna aalajangertussaallugu. Illuanik saqisut oqarpoq, isumaqatigiissuteqalerusullutik, sullivini pitsaasunik atugaqarfiusunik, soorlu timmisartuutileqatigiinni allani sullivinnilu allani taamaattoq.
Isumaqatigiinniarnernut malinnaasut aamma oqarput, akissarsiat allallu pillugit isumaqatigiissutisst aaqqilereertut. Aamma soraarnerusutisiassanut tunngasut ajornartorsiutaajunnaareernerarpat. Illua tungeriit isumaqatigiissutigigaat, akissarsiat ukiut pingasut ingerlaneranni 12 procentimik qaffassasut, tusarfitta oqaatigaat.
