Saqisut sulinerminnik suli uninngatitsipput
Saqisut Air Greenlandimiittut sulinerminnik suli unitsitsipput.
Naak sulinermik unitsitsineq isumaqatigiissutinik unioqqutitsinerusutut sulisutut peqatigiiffigisamit, Dansk Funktionærfundimit nalunaarutigineqareersoq, suliartunnginnisssartik saqisut Air Greenlandimut ullaaq manna nalunaarutigaat.
Tamanna pissutigalugu sulisoqarnermut eqqartuussivimmut suliasssanngortitsisoqarpoq.
Air Greenlandimi saqisut sulisoqarnermut eqqartuussivimmut tunniunneqarput, Morten Nielsen Air Greenlandimi sulisoqarnermut pisortaasoq raatiuaviisimut aatsaannguummat taama oqarpoq.
– Isumaqatiginninniartoqanngilaq, torinngilluinnarporlu, paasisinnaanngilluinnarpara suliumajunnaarneq. Sulisummi sulisitsisunik suliumajunnaarnissartik sioqqullugu oqaloqatiginninnissamik saaffiginnissuteqanngillat, Morten Nielsen Københavnimiit Nuummut ingerlaalersoq taama oqarpoq. Morten Nielsenip naatsorsuutigaa sulisunit suliartulersunit akunnerni tulliuttuni sianerfigineqarumaarluni.
Timmisartuni saqisut akissarsiat sulinermilu atukkat pillugit isumaqatigiissut nutaaq ukioq kingulleq atsiorpaat, juunillu aallaqqaataani 2006-imi isumaqatigiissut atuutilersinneqarluni.
Air Greenlandip naatsorsuutigaa sulisut suliumajunnaarnerannut atatillugu aningaasartuutit saqisut kattuffianniit matussuserneqarumaartut.
Timmisartoq Kastrupimiit Kangerlussualiartussaq minutsialunnguit matuma siornatigut nunatsinnukarniarluni Kastrupimiit qangattarpoq. Saqisut immikkut ittumik isumaqatigiissutillit kiffartuussisuupput, akunnernillu pingasunik kinguaattoortoqarluni nunatsinnukartoqarpoq.
Nunatta iluani timmisartuussinerit kinguaattoorfiussasut Air Greenlandimit aamma nalunaarutigineqarpoq.
