Saqisut suliartoqqeqqusaagaluarnertik itigartippaat

Air Greenlandip timmisartuutaani saqisut suliartoqqeqqusaagaluarnertik itigartippaat taarsiulluguli piumasaraat sulinermi atukkatik akissaatitillu pillugit aqutsisunit isumaqatiginiarneqarnissartik. – Siulittaasutta Anders Mark Jensenip suliagut nangeqqugaluarpai, taamaaliorusunngilagulli timmisartortitseqatigiiffimmi aqutsisut qissimikkumanngimmatigulluunniit, taama oqarput Air Greenlandip timmisartuutaani saqisut.
aggustip 28-at 2007 07:45

Timmisartuni saqisut erseqqissarpaat isumaqatigiissutertik maannakkut atuuttoq paasissutissat naatsorsuutillu kukkusut tunngavigalugit sanaajusoq.

Timmisartuni saqisut ullaaq manna aalajangerput suliunnaarniarlutik. Kinguneranik Danmarkimiit Kalaallit Nunaannut timmisartoqassanngitsoq, tusagassaqartitsivik Ritzau nalunaarpoq.

Timmisartuni saqisut akissaatitik sulinerminnilu atukkatik naammagittaalliutigaat, Air Greenlandip timmisartuutaani saqisut siulittaasuat Anders Mark Jensen oqarpoq nangipporlu: Sulisut pisortaminnut allagaqareerput akissutisippulli naammaginngisaminnik. Qaammatilli arfineq pingasut kingulliit atukkatik pitsanngorsarniarlugit sulissutitik kinguneqanngimmata utaqqikatapput, Anders Mark Jensen oqarpoq.

Air Greenland oqaaseqarumanngilaq, sulinermut atatillugu ataatsimiinnerup tunngaviata nalunaarutigineqarnissaa utaqqeqqaarusukkamikku.

Air Greenlandip ilanngullugu nalunaartigaa naatsorsuutitigitsik akunnerit tallimat ingerlareerpata timmisartuussinerit naliginnaasumik aallarteqqinneqarumaartut.

Nunatsinni ullumi timmisartuussinerit aamma kalluarneqassasut oqaatigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq