"Sapiitsut" nersualaarneqartoq
- Nersorinninneruvoq annertooq, assilisanik takutitsinermi suleqataasoq, Iben Mondrup oqarpoq.
Assit filminut piviusuunngitsunut inuttaasuusaartitat assiliortorneqarneri plakatinngorlugit takutitassiaapput, takutitsinerlu taaguuteqarluni Sapiitsut/Heroes.
- Hardenbergip assilisai, ilaatigut politiit kalaallit marluk aallaaserlutik imminnut tunullutik kiinaallu ilumoorsaartut aammalu aappariit inuusuttut marluk asannippaluttumik kiinnerlutik assilisaapput torrallatat, aviisip Politikenip eqqumiitsulianik allaaserinnittartuanit nersualaarneqarput, sisamanillu uummataasanik tunillugit.
Kalaallit Nunaanniit assilisanik piserusuttunik suli noqqaasoqanngilaq, taamaattorli plakaati ataaseq Julie Eden Hardenbergip nammineerluni inniminnersimavaa Nunatsinnit piserusuttumut ataatsimut.
Statens Kunstfondip plakatit arfineq-pingasut pisiarisimavai. Plakati ataaseq akeqarpoq 6.000 koruuninik. Plakaatit tulleriiaat sisamaapput. Ataaserlu pisiarineqarsimavoq Museet for Fotokunstimit 70.000 koruunilerlugu.
