Sapiitsuliorsimasutut tikilluaqquneqarpoq

Inuusuttut untritillit Kalujev sapiitsutut nersorniarlugu Moskvamut tikilluaqquaat. Mittarfimmiit illoqarfiup tungaanut inuusuttut Putinimik tapersersuisut allagartarsuarnik nassarlutik tikilluaqqusipput. Inuusuttut suaartartut Kalujev inutsialaanerarlugu nersorniarpaat, tassa 2002-mi timmisartup nakkarneranut pisuutillugu qallunaaq savimmik kapoorlugu toqussimammagu. 2002-mi tyskit timmisartuata assartuutip russillu timmisartuata silaannarmi apornerisa nalaani, Peter Nielsen, Skyguide-mi sulilluni nakkutilliisuuvoq. Russit timmisartuanni ilaasut amerlanersaat russiupput atuartut atuanngiffimminni takusassarsiortut. Katillugit inuit 71-it ajunaarput, Kalujev-illu tassa aamma nulia meeraalu marluk ajunaaqataapput. Kalujevip eqqartuunneqarnerata nalaani præsident Putin tapersersuiuarsimavoq, illuliassanillu titartaasartup 51-inik ukiullip Kalujevip tamanna puigorsimanngilaa. Kalujev oqalugiarnermini præsidenti, inuiaat russit russillu naalakkersuisui tapersersuisimanerannut qutsavigai. Kalujev ukiuni arfineq pingasuni paarnaarussassanngorlu pineqaatissinneqaraluarpoq, Schweitzimili eqqartuussisut ungasinngitsukkut pineqaatissinneqarnera allanngortippaat, ukiuni tallimani qaammatinilu pingasuni paarnaarussassanngorlugu, tassalu Kalujev ippassaq iperagaavoq.